அலுவலக பீரோ சாய்ந்து பஸ் நிறுவன அதிகாரி சாவு

மலைக்கோட்டை:

லால்குடி அருகே உள்ள அப்பாதுரை கிராமம் வடக்கு தெருவைச் சேர்ந்தவர் சண்முகம் (வயது 52). இவர் திருச்சி-கரூர் பைபாஸ் ரோட்டில் உள்ள ஒரு தனியார் பஸ் நிறுவனத்தில் உதவி மேலாளராக பணியாற்றி வந்தார். இந்நிலையில் நேற்று முன்தினம் அவர் பணியில் இருந்த போது அலுவலகத்தில் உள்ள பீரோவுக்கு மேல் இருந்த ஒரு கோப்பை எடுப்பதற்கு சண்முகம் முயற்சி செய்தார். அப்போது எதிர்பாராதவிதமாக பீரோ அவர் மீது சாய்ந்தது. இதில் மயங்கி விழுந்த அவரை சக ஊழியர்கள் மீட்டு ஸ்ரீரங்கம் அரசு மருத்துவமனைக்கு கொண்டு சென்றனர். அங்கு டாக்டர்கள் தீவிர சிகிச்சை அளித்தும் பலனின்றி, சண்முகம் நேற்று பரிதாபமாக இறந்தார். இதுகுறித்து அவரது மனைவி காஞ்சனா கோட்டை போலீசில் புகார் கொடுத்தார். அதன்பேரில் இன்ஸ்பெக்டர் தயாளன் வழக்குப்பதிவு செய்து விசாரணை நடத்தி வருகிறார்.