மண் மாதிரி சேகரிப்பு முகாம்

பரமத்திவேலூர்:

கபிலர்மலை ஊராட்சி ஒன்றியம் சோழசிராமணி அருகே உள்ள சுள்ளிபாளையத்தில் மண் மாதிரி சேகரிப்பு ஆய்வு குறித்த விழிப்புணர்வு முகாம் நடந்தது. கபிலர்மலை வட்டார தோட்டக்கலை உதவி இயக்குனர் சின்னதுரை தலைமை தாங்கினார். முகாமில் விவசாயிகளிடம் இருந்து மண் மாதிரிகள் சேகரித்து பரிசோதனை செய்யப்பட்டு ஆய்வு அறிக்கை வழங்கப்பட்டது.

இந்த ஆய்வறிக்கையில் பயிர் சாகுபடி செய்ய உள்ள நிலத்தின் கார அமிலதன்மை, தொழுஉரம், பயிருக்கு தேவையான உரங்கள், நுண்ணூட்டச்சத்து, பேரூட்டச்சத்துக்கள் மற்றும் அவற்றை பயன்படுத்தும் அளவு உள்ளிட்ட விவரங்கள் விவசாயிகளிடம் தெரிவிக்கப்பட்டது. இதில் மூத்த வேளாண்மை அலுவலர் சவுந்தரராஜன், நடமாடும் மண் பரிசோதனை நிலைய வேளாண் அலுவலர்கள் அருள்ராணி, அன்புச்செல்வி, உதவி வேளாண்மை அலுவலர் ஜெயமணி மற்றும் உதவி தோட்டக்கலை அலுவலர் கதிர்வேல் உள்ளிட்டோர் கலந்து கொண்டனர்.