தோகைமலை அருகே மாடு மாலை தாண்டும் நிகழ்ச்சி

மாடு மாலை தாண்டும் நிகழ்ச்சி

கரூர் மாவட்டம், தோகைமலை அருகே வரகூரில் வசிக்கும் கம்பலத்து நாயக்கர் சமூகத்தினருக்கு கோலகம்பளி நாயக்கர் மந்தையில் எருதுக்குட்டை கோவில் அமைந்து உள்ளது. இக்கோவில் திருவிழாவையொட்டி நேற்று மாலையில் மாடு மாலை தாண்டும் நிகழ்ச்சி நடைபெற்றது.

முதலில் திருச்சி, திண்டுக்கல், கரூர் உள்பட சுற்றுவட்டார பகுதிகளில் இருந்து வந்த 14 மந்தையர்களுக்கு வரவேற்பு நிகழ்ச்சி நடந்தது. இதையடுத்து அழைத்து வரப்பட்ட அனைத்து மாடுகளுக்கும் புன்னியதீர்த்தம் தெளிக்கப்பட்டு தாரை, தப்பட்டை முழக்க கோலகம்பளி நாயக்கர் மந்தையில் இருந்து 3 கிலோ மீட்டர் தொலைவில் உள்ள எல்லைசாமி கோவிலுக்கு ஊர்வலமாக அழைத்து செல்லப்பட்டன.

எலுமிச்சைப்பழம் பரிசு

அங்கு எல்லைச்சாமிக்கு சிறப்பு அபிஷேகம் செய்யப்பட்டு, மாடுகளுக்கு புன்னிய தீர்த்தம் தெளிக்கப்பட்டது. இதையடுத்து அங்கிருந்து 300-க்கும் மேற்பட்ட மாடுகள் கோலகம்பளி நாயக்கர் மந்தையில் வைக்கப்பட்டிருந்த எல்லைக்கோட்டை நோக்கி சீறிப்பாய்ந்து ஓடியது. அப்போது அனைவரும் கைத்தட்டி ஆரவாரம் செய்தனர்.

இதில், திருச்சி மாவட்டம், இலமனம் ராஜகோடங்கிபட்டி ராஜகோடங்கி மந்தை மாடு முதலாவதாகவும், கரூர் மாவட்டம் வரகூர் கோலகம்பளி மந்தை மாடு 2-வதுதா கவும் ஓடி வந்து வெற்றி பெற்றது. இதையடுத்து வெற்றி பெற்ற மாடுகளின் மீது சமூக வழக்கப்படி 3 கன்னிப்பெண்கள் கையில் வைத்திருந்த மஞ்சப்பொடி தூவப்பட்டு எலுமிச்சம் பழம் பரிசாக வழங்கப்பட்டன.

தேவராட்டம்

பின்னர் 3 கன்னிப்பெண்களும் எல்லைக்கோட்டில் இருந்து கோவிலுக்கு தேவராட்டத்துடன் அழைத்து செல்லப்பட்டனர்.

இதில் ஊர்நாயக்கர், மந்தை நாயக்கர், திருச்சி, திண்டுக்கல், கரூர் உள்ளிட்ட பல்வேறு மாவட்டங்களை சேர்ந்த ஏராளமான பக்தர்கள் கலந்து கொண்டு சாமி தரிசனம் செய்தனர்.