விழுப்புரம்

விழுப்புரம் அருகே பூவரசங்குப்பம் கிராமத்தில் மிகவும் பிரசித்தி பெற்ற லட்சுமி நரசிம்மர் கோவில் உள்ளது. இக்கோவிலில் 150 ஆண்டுகளுக்கு பிறகு ரூ.50 லட்சம் மதிப்பில் புதிதாக தேர் செப்பனிடப்பட்டு வர்ணம் தீட்டப்பட்டுள்ளது. இதையடுத்து தேர் வெள்ளோட்டம் நாளை (வியாழக்கிழமை) காலை 9 மணிக்கு சுவாதி நட்சத்திரத்தன்று நடக்கிறது. இதையொட்டி அந்த தேர், கோவில் முன்பிருந்து வெள்ளோட்டமாக புறப்பட்டு சிவன் கோவில் தெரு, மாரியம்மன் கோவில் தெரு, பிள்ளையார் கோவில் தெரு, சந்திகாப்பான் கோவில் தெரு ஆகிய 4 மாட வீதிகளின் வழியாக சென்று மீண்டும் கோவிலை சென்றடைகிறது. இதற்கான ஏற்பாடுகளை இந்து சமய அறநிலையத்துறை இணை ஆணையர் சிவக்குமார், கோவில் செயல் அலுவலர் மதனா, அர்ச்சகர் பார்த்தசாரதி பட்டாச்சாரியார் மற்றும் கோவில் பணியாளர்கள், கிராம மக்கள் செய்து வருகின்றனர்.