நாமக்கல் மாவட்டத்தில் பள்ளி மாணவர்களுக்கான செஸ் போட்டி 2,409 பேர் பங்கேற்பு

நாமக்கல் மாவட்டத்தில் பள்ளி மாணவ, மாணவிகளுக்கான செஸ் போட்டி நடந்தது. இதில் 2,409 மாணவ, மாணவிகள் கலந்து கொண்டனர்.

சர்வதேச செஸ் போட்டி

44-வது செஸ் ஒலிம்பியாட் போட்டி இந்திய வரலாற்றில் முதன் முறையாக தமிழ்நாட்டில் சுற்றுலா தலமான மாமல்லபுரத்தில் வருகிற 28-ந் தேதி தொடங்கி அடுத்தமாதம் (ஆகஸ்டு) 10-ந் தேதி வரை நடைபெற உள்ளது. இப்போட்டியில் சர்வதேச அளவில் 186 நாடுகளை சேர்ந்த 2 ஆயிரத்துக்கும் மேற்பட்ட வீரர் மற்றும் வீராங்கனைகள் பங்கேற்க உள்ளனர்.

இப்போட்டியை அரசு பள்ளி மாணவர்கள் நேரடியாக பார்ப்பதற்காகவும், சர்வதேச வீரர்களுடன் கலந்துரையாடவும், தமிழ்நாடு அரசு பள்ளி கல்வித்துறையின் மூலமாக ஏற்பாடு செய்யப்பட்டு உள்ளது. அதன்படி மாவட்ட அளவில் 2 மாணவர்கள் தேர்வு செய்யப்பட உள்ளனர்.

அதற்காக நாமக்கல் மாவட்டத்தில் உள்ள அனைத்து அரசு பள்ளிகளிலும் செஸ் போட்டியை நடத்தி மாணவ, மாணவிகளை தேர்வு செய்வதற்காக 2 நாட்கள் போட்டிகள் நடைபெற்றது. 1-ம் வகுப்பு முதல் 5-ம் வகுப்பு வரை தனியாகவும், 6 முதல் 8-ம் வகுப்பு வரை தனியாகவும், 9 மற்றும் 10-ம் வகுப்புகளுக்கு தனியாகவும், 11 மற்றும் 12-ம் வகுப்புகளுக்கு தனியாகவும் அரசு பள்ளி மாணவ, மாணவிகளின் திறமையை வெளிப்படுத்துவதற்காக போட்டிகள் நடைபெற்றது.

2,409 பேர் பங்கேற்பு

இப்போட்டிகளில் நாமக்கல் மாவட்டத்தில் 1 முதல் 5 வகுப்பு வரை படிக்கும் 216 மாணவர்களும், 205 மாணவிகளும், 6 முதல் 8 வகுப்பு வரை படிக்கும் 447 மாணவர்களும், 373 மாணவிகளும், 9 மற்றும் 10-ம் வகுப்பு படிக்கும் 318 மாணவர்களும், 270 மாணவிகளும், 11 மற்றும் 12-ம் வகுப்பு படிக்கும் 368 மாணவர்களும், 212 மாணவிகளும் என மொத்தம் 1,349 மாணவர்கள், 1,060 மாணவிகள் என மொத்தம் 2,409 மாணவ, மாணவிகள் கலந்து கொண்டனர்.

இப்போட்டியில் முதல் 2 இடங்களை பெற்ற மாணவ, மாணவிகள் ஒன்றிய அளவிலான போட்டியில் பங்கு பெறுவார்கள். ஒன்றிய அளவில் நடைபெறும் போட்டியில் முதல் 3 இடங்களை பெறக்கூடிய மாணவ மாணவிகள் மாவட்ட அளவில் நடைபெறும் போட்டிக்கு தகுதி பெறுவார்கள். மாவட்டத்தில் முதல் 2 இடங்களை பெறும் மாணவ, மாணவிகள் மாமல்லபுரத்தில் நடக்கக்கூடிய சர்வதேச செஸ் ஒலிம்பியாட் போட்டியை பார்க்க மற்றும் சர்வதேச வீரர்களுடன் கலந்துரையாட அழைத்து செல்லப்படுவார்கள் என அதிகாரிகள் தெரிவித்தனர்.