கல்லூரி மாணவி கொலை

கல்லூரி மாணவி

திண்டுக்கல் மாவட்டம், ஆத்தூர் தாலுகா, அய்யம்பாளையம் ஓமலூர் தெருவை சேர்ந்தவர் அழகுபாண்டி. இவர் கட்டிட வேலை செய்து வருகிறார். இவரது மனைவி முத்தாலம்மாள். இவர்களுக்கு 3 மகள்கள் மற்றும் ஒரு மகன் உண்டு. இதில் 2-வது மகள் ஜோகிதா (வயது 18).

இவர் திருச்சி தென்னூர் பாரதி நகரில் உள்ள தனது அத்தை மகாலட்சுமி (40) வீட்டில் தங்கியிருந்து சத்திரம் பஸ் நிலையம் அருகே உள்ள ஒரு கல்லூரியில் பி.எஸ்சி. கம்ப்யூட்டர் சயின்ஸ் முதலாம் ஆண்டு படித்து வந்தார். மகாலட்சுமி மளிகை கடையில் வேலை பார்த்து வருகிறார். மேலும் ஜோகிதாவின் அக்காள் பவித்ராவுக்கு திருமணமாகி திருச்சியில் உள்ள அவரது அத்தை வீட்டிற்கு அருகே வசித்து வருகிறார்.

பிணமாக கிடந்தார்

இந்த நிலையில் மகாலட்சுமி நேற்று காலை மளிகை கடைக்கு வேலைக்கு சென்றுவிட்டார். இதையடுத்து ஜோகிதா வீட்டில் தனியாக இருந்தார். மாலை 4.30 மணியளவில் அவருக்கு பவித்ரா போன் செய்தார். ஆனால் ஜோகிதாவின் செல்போன் சுவிட்ச் ஆப் செய்யப்பட்டு இருந்தது.

இதனால் சந்தேகம் அடைந்த பவித்ரா, அத்தை வீட்டுக்கு சென்று பார்த்துள்ளார். அப்போது ஜோகிதா கழுத்து மற்றும் முதுகு பகுதியில்ஆயுதத்தால் குத்துப்பட்ட காயங்களுடன் இறந்து கிடந்ததை கண்டு பவித்ரா அதிர்ச்சி அடைந்து, கதறி அழுதார்.

சொந்த ஊருக்கு...

மேலும் இது பற்றி மகாலட்சுமிக்கு தகவல் கொடுத்தார். பின்னர் அங்கு வந்த அவரது உறவினர்கள் ஜோகிதாவின் உடலுடன் சொந்த ஊருக்கு புறப்பட்டு சென்றனர். இந்த சம்பவம் பற்றி தகவல் அறிந்த தில்லைநகர் போலீசார் ஜோகிதாவின் உறவினர்களை தொடர்பு கொண்டு, அவரது உடலை திருச்சிக்கு கொண்டு வரும்படி கூறினர்.இதையடுத்து ஜோகிதாவின் உடலை அவர்கள் திருச்சிக்கு கொண்டு வந்தனர். பின்னர் போலீசார் அவரது உடலை கைப்பற்றி பிரேத பரிசோதனைக்காக திருச்சி அரசு மருத்துவமனைக்கு அனுப்பி வைத்தனர்.

கொலை

ஜோகிதாவின் உடலில் காயங்கள் இருந்ததால் அவர் கொலை செய்யப்பட்டிருக்கலாம் என்று போலீசார் கருதினர். மேலும் இது குறித்து வழக்குப்பதிவு செய்து, ஜோகிதாவை கொலை செய்தது யார்? அதற்கான காரணம் என்ன? என்பது உள்ளிட்ட பல்வேறு கோணங்களில் போலீசார் தீவிர விசாரணை நடத்தி வருகின்றனர்.

இந்த சம்பவம் திருச்சி பகுதியில் பெரும் பரபரப்பை ஏற்படுத்தியுள்ளது.