அரசு பள்ளி காவலாளி மா்மசாவு

பள்ளிபாளையம்

பள்ளிபாளையம் காவேரி ஆர்.எஸ்.பகுதியில் உள்ள அரசு ஊராட்சி ஒன்றிய தொடக்கப்பள்ளியில் பெற்றோர் ஆசிரியர் கழகம் சார்பில் பள்ளியின் காவலாளியாக நியமிக்கப்பட்டு பணிபுரிந்தவர் பொன்னுசாமி (வயது 80). இவர் கடந்த 5 ஆண்டுகளாக தொடக்கப்பள்ளியில் இரவு நேர காவலாளியாக இருந்து வந்தார். இந்தநிலையில் நேற்று காலை ஆசிரியர்கள் பள்ளிக்கு வந்தபோது மர்மமான முறையில் பொன்னுசாமி இறந்து கிடந்தார். இதனை கண்டு அதிர்ச்சி அடைந்த பள்ளி ஆசிரியர்கள் பள்ளிபாளையம் போலீஸ் நிலையத்திற்கு தகவல் கொடுத்தனர். இதன்பேரில் சம்பவ இடத்திற்கு விரைந்து வந்த பள்ளிபாளையம் போலீசார் அவரது உடலை கைப்பற்றி பிரேத பரிசோதனைக்காக பள்ளிபாளையம் அரசு மருத்துவமனைக்கு அனுப்பி வைத்தனர். இதையடுத்து முதியவர் மர்மமான முறையில் உயிரிழந்தது குறித்து தொடர்ந்து போலீசார் விசாரணை நடத்தி வருகின்றனர். இந்த சம்பவத்தால் நேற்று பள்ளிக்கு விடுமுறை விடப்பட்டது. பிரேத பரிசோதனை அறிக்கை வந்த பின் முதியவர் எப்படி இறந்தார்? என்பது தெரியவரும் என இன்ஸ்பெக்டர் சந்திரகுமார் கூறினார்.