இல்லம் தேடி இளைஞரணி உறுப்பினர்களை சேர்க்க வேண்டும்- தி.மு.க. செயல்வீரர்கள் கூட்டத்தில் தீர்மானம்

இல்லம் தேடி இளைஞரணி உறுப்பினர்களை சேர்க்க வேண்டும் என மாநகர தி.மு.க. செயல்வீரர்கள் கூட்டத்தில் தீர்மானம் நிறைவேற்றப்பட்டது.

செயல்வீரர்கள் கூட்டம்

தஞ்சை மாநகர தி.மு.க. செயல்வீரர்கள் கூட்டம் தஞ்சையில் நேற்றுகாலை நடந்தது. இதற்கு மாநகர அவைத் தலைவர் சுப்பிரமணியன் தலைமை தாங்கினார். மாநகர செயலாளரும், மேயருமான சண்.ராமநாதன் வரவேற்றார்.

இதில் மத்திய மாவட்ட செயலாளர் துரை.சந்திரசேகரன் எம்.எல்.ஏ., தலைமை செயற்குழு உறுப்பினர்கள் உபயதுல்லா, டி.கே.ஜி.நீலமேகம் எம்.எல்.ஏ., மாவட்ட அவைத் தலைவர் இறைவன், மாவட்ட துணைச் செயலாளர் மணிமாறன், கனகவள்ளி பாலாஜி, மாவட்ட பொருளாளர் எல்.ஜி.அண்ணா ஆகியோர் பேசினர்.

மு.க.ஸ்டாலினுக்கு பாராட்டு

கூட்டத்தில், தி.மு.க. தலைவராக மீண்டும் முதல்-அமைச்சர் மு.க.ஸ்டாலின் தேர்வு செய்யப்பட்டதற்கு பாராட்டும், வாழ்த்தும் தெரிவித்து கொள்கிறோம். நவம்பர் 1-ந் தேதியை உள்ளாட்சி தினமாக அறிவித்து மாநகர சபை கூட்டம் நடத்த அனுமதி அளித்த முதல்-அமைச்சர் மு.க.ஸ்டாலினுக்கு பாராட்டு தெரிவிப்பது.

வருகிற 27-ந் தேதி மாநில இளைஞரணி செயலாளர் உதயநிதிஸ்டாலின் எம்.எல்.ஏ. பிறந்தநாளை சிறப்பாக கொண்டாடும் வகையில் தஞ்சை மாநகரில் உள்ள 51 வட்டங்களிலும் நிர்வாகிகளை கொண்டு முன்னோடிகளின் தலைமையில் தி.மு.க. கொடியேற்றி இனிப்புகள் வழங்கி, நலத்திட்ட உதவிகள் வழங்க வேண்டும்.

இல்லம் தேடி இளைஞரணி உறுப்பினர்கள்

தஞ்சை மாநகரில் உள்ள 51 வட்டங்களிலும் வாக்குசாவடி முகவர்கள் நியமிக்க வேண்டும். உதயநிதிஸ்டாலின் எம்.எல்.ஏ. அறிவுறுத்தல்படி இல்லம் தேடி இளைஞரணி உறுப்பினர்களை சேர்த்து தஞ்சை மாநகரம் முன்மாதிரியாக செயல்பட வேண்டும் என்பன உள்ளிட்ட பல்வேறு தீர்மானங்கள் நிறைவேற்றப்பட்டன.

இதில் மாநில விவசாய அணி துணை அமைப்பாளர் ஜித்து, பொதுக்குழு உறுப்பினர்கள் ஆறுமுகம், புண்ணியமூர்த்தி, தர்மராசன், மாநகர துணைச் செயலாளர்கள் எழில், உஷா, பொருளாளர் காளையார் சரவணன், பகுதி செயலாளர்கள் சந்திரசேகர மேத்தா, சதாசிவம், கார்த்திகேயன், நீலகண்டன், மாநகராட்சி துணை மேயர் டாக்டர் அஞ்சுகம்பூபதி உள்பட பலர் கலந்து கொண்டனர். முடிவில் மாநகர துணைச் செயலாளர் செந்தில்குமார் நன்றி கூறினார்.