மின்சாரம் தாக்கி முதியவர் பலி

மயிலம்,

மயிலம் அருகே ரெட்டணை பகுதியை சேர்ந்தவர் கஜேந்திரன் (வயது 50). இவர் நேற்று மாலை குடிபோதையில் சிங்கனூர் ஏரிக்கரை அருகே உள்ள மின்மாற்றியில் ஏறி உள்ளார். அப்போது எதிர்பாராத விதமாக மின்சாரம் தாக்கியதில் அவர் தூக்கி வீசப்பட்டார். இதில் பலத்த காயமடைந்த கஜேந்திரன் சம்பவ இடத்திலேயே பரிதாபமாக இறந்தார். இது குறித்த தகவலின் பேரில் மயிலம் போலீசார் சம்பவ இடத்துக்கு விரைந்து சென்று கஜேந்திரன் உடலை கைப்பற்றி பிரேத பரிசோதனைக்காக முண்டியம்பாக்கம் அரசு மருத்துவக்கல்லூரி மருத்துவமனைக்கு அனுப்பி வைத்தனர். தொடர்ந்து இது குறித்த புகாரின் பேரில் போலீசார் வழக்குப்பதிவு செய்து விசாரணை நடத்தி வருகின்றனர்.