அரசு பஸ் மோதி முதியவர் பலி

திருச்சி மாவட்டம், கல்லக்குடி அருகே உள்ள மேலபெருங்காவூர் கிராமத்தை சேர்ந்தவர் மகிமைநாதன் (வயது 65). இவர் விராலிமலை ஒன்றியம் மாத்தூரில் உள்ள ஒரு சர்ச்சில் சமையலராக பணியாற்றி வந்தார். இந்தநிலையில் அவர் நேற்று முன்தினம் இரவு 9 மணியளவில் மாத்தூரில் திருச்சி-புதுக்கோட்டை சாலையை கடக்க முயன்றுள்ளார். அப்போது புதுக்கோட்டையில் இருந்து திருச்சியை நோக்கி புதுக்கோட்டை மச்சுவாடியை சேர்ந்த கார்த்தி (வயது 39) என்பவர் ஓட்டிச் சென்ற அரசு பஸ் எதிர்பாராத விதமாக முதியவர் மகிமைநாதன் மீது மோதியது. இதில் பலத்த காயமடைந்த அவர் சம்பவ இடத்திலேயே பரிதாபமாக இறந்தார். இந்த விபத்து குறித்து தகவல் அறிந்த மாத்தூர் போலீசார் சம்பவ இடத்திற்கு விரைந்து சென்று பலியான மகிமைநாதன் உடலை கைப்பற்றி பிரேத பரிசோதனைக்காக திருச்சி அரசு மருத்துவமனைக்கு அனுப்பி வைத்தனர். இதுகுறித்து மாத்தூர் போலீசார் வழக்குப்பதிவு செய்து விசாரணை நடத்தி வருகின்றனர்.