ஜலகண்டாபுரத்தில்மின்சாரம் தாக்கி பூ வியாபாரி பலி

மேச்சேரி,

ஜலகண்டாபுரம் காட்டம்பட்டி பகுதியை சேர்ந்தவர் பெருமாள் (வயது 40). இவருடைய மனைவி ஜோதி. இவர்கள் 2 பேரும் காட்டம்பட்டியில் பூக்கடை வைத்துள்ளனர். இந்த நிலையில் பூக்கடையில் நேற்று காலை ரேடியோ போடுவதற்காக பெருமாள் மின்சார வயரை பிளக்கில் மாட்டி உள்ளார். அப்போது எதிர்பாராதவிதமாக மின்சாரம் தாக்கியதில் மயங்கி கீழே விழுந்தார். உடனே அவரை அக்கம்பக்கத்தினர் மீட்டு அருகில் உள்ள தனியார் மருத்துவமனையில் சேர்த்தனர். அங்கு அவருக்கு முதலுதவி சிகிச்சை அளிக்கப்பட்டது. பின்னர் அவர் மேல் சிகிச்சைக்காக எடப்பாடி அரசு ஆஸ்பத்திரியில் சேர்த்தனர். அங்கு பரிசோதித்த டாக்டர்கள் அவர் ஏற்கனவே இறந்து விட்டதாக தெரிவித்தனர். இது குறித்து ஜலகண்டாபுரம் போலீசார் வழக்குப்பதிவு செய்து விசாரணை நடத்தி வருகின்றனர்.