பள்ளி கல்வித்துறை சார்பில் குடியரசு தினத்தை முன்னிட்டு பள்ளி மாணவ, மாணவிகளுக்கான மாவட்ட அளவிலான விளையாட்டு போட்டிகள் தேனி அருகே முத்துத்தேவன்பட்டியில் உள்ள வேலம்மாள் மெட்ரிக் பள்ளி வளாகத்தில் நேற்று தொடங்கியது. மாவட்டத்தில் 8 வட்டார அளவில் நடந்த விளையாட்டு போட்டிகளில் முதல் 2 இடங்களை பிடித்த 950 மாணவ, மாணவிகள் மாவட்ட அளவிலான போட்டிகளுக்கு தேர்வு செய்யப்பட்டு இருந்தனர்.

அந்த மாணவ, மாணவிகள் இந்த போட்டிகளில் பங்கேற்கின்றனர். முதல் நாளில் 3 ஆயிரம் மீட்டர் ஓட்டம், 400 மீட்டர் ஓட்டம், நீளம் தாண்டுதல், குண்டு எறிதல், ஈட்டி எறிதல் உள்ளிட்ட பல்வேறு போட்டிகள் நடந்தன. இதில் மாணவ, மாணவிகள் ஆர்வத்துடன் கலந்து கொண்டு விளையாடினர். 2-வது நாளாக இன்றும் (வெள்ளிக்கிழமை) தடகள போட்டிகள் நடக்கின்றன. இந்த போட்டிகளில் தேர்வு செய்யப்படும் மாணவ, மாணவிகள் மாநில அளவிலான போட்டிகளில் பங்கேற்பார்கள். போட்டிகளுக்கான ஏற்பாடுகளை பள்ளிக்கல்வித்துறை அலுவலர்கள் செய்துள்ளனர்.