இழப்பீடு வழங்காததால் அரசு பஸ்கள் ஜப்தி

பொள்ளாச்சி

விபத்தில் காயமடைந்த நபருக்கு இழப்பீடு வழங்காததால் அரசு பஸ்கள் ஜப்தி செய்யப்பட்டன.

விபத்தில் காயம்

வால்பாறையில் இருந்து பொள்ளாச்சி நோக்கி கடந்த 2012-ம் ஆண்டு நவம்பர் மாதம் 11-ந்தேதி ஒரு அரசு பஸ் வந்து கொண்டிருந்தது. இந்த பஸ் ஆழியாறு அருகே 3-வது கொண்டை ஊசி வளைவில் வந்த போது திடீரென்று கட்டுப்பாட்டை இழந்து பள்ளத்தில் கவிழ்ந்து விபத்துக்குள்ளானது. இதில் 8 பேர் இறந்தனர். 24 பேர் காயமடைந்தனர். இந்த விபத்தில் படுகாயமடைந்த ஆனந்தராஜ் என்பவருக்கு வலது கை செயல் இழந்தது.

இதை தொடர்ந்து அவர் இழப்பீடு கேட்டு பொள்ளாச்சி சப்-கோர்ட்டில் வழக்கு தொடர்ந்தார். இந்த வழக்கில் கடந்த 2018-ம் ஆண்டு நீதிபதி தீர்ப்பளித்தார். இதில் மனுதாரருக்கு இழப்பீடு தொகை ரூ.13 லட்சத்து 16 ஆயிரத்து 947-ம், அதற்குரிய வட்டி தொகை யையும் சேர்த்து மொத்தம் ரூ.24 லட்சம் இழப்பீடாக வழங்க உத்தரவிட்டார்.

அரசு பஸ்கள் ஜப்தி

ஆனால் அந்த இழப்பீட்டு தொகையை அரசு போக்குவரத்து கழகம் வழங்கவில்லை. இதை தொடர்ந்து கடந்த 2022-ம் ஆண்டு கோர்ட்டில் நிறைவேற்று மனு தாக்கல் செய்யப்பட்டது. இந்த மனுவை விசாரித்த நீதிபதி மோகனவள்ளி இழப்பீடு வழங்காததால் அரசு பஸ்களை ஜப்தி செய்வதற்கு உத்தரவிட்டார். இதை தொடர்ந்து கோர்ட்டு ஊழியர்களுடன் பஸ் நிலையத்திற்கு சென்று பொள்ளாச்சியில் இருந்து கோவை செல்ல இருந்த 2 பஸ்கள் ஜப்தி செய்யப்பட்டன. இந்த வழக்கில் மனுதாரர் தரப்பில் வக்கீல் மீரான் மொய்தீன் ஆஜரானார்.