சமையல் கூடங்களில் சப்-கலெக்டர் ஆய்வு

வால்பாறை பகுதியில் உள்ள 61 பள்ளிக் கூடங்களில் 1,300 குழந்தைகள் தமிழக அரசின் காலை சிற்றுண்டி திட்டத்தின் கீழ் சிற்றுண்டி வழங்கப்பட உள்ளது.

இதற்காக நகராட்சி நிர்வாகம் சார்பில் வால்பாறை, சோலையாறு நகர், வாட்டர்பால்ஸ் மற்றும் உருளிக்கல் ஆகிய 4 இடங்களில் தலா ரூ.36 லட்சம் மதிப்பில் சமையல் கூடம் கட்டப்பட்டு உள்ளது. அந்த சமையல் கூடங்களில் உணவு தயாரிப்பு, பாதுகாப்பு, சமைத்த உணவுகளை வாகனங்களில் எடுத்துச் செல்வது உள்பட அடிப்படை வசதிகளை நேரில் பார்வையிட்டு பொள்ளாச்சி சப்- கலெக்டர் பிரியங்கா ஆய்வு செய்தார்.

மேலும் அவர், அந்த 4 சமையல் கூடங்களில் தயாரிக்கப்படும் காலை சிற்றுண்டிகள் ஒவ்வொரு பள்ளிக்கூடங்களுக்கும் எவ்வளவு நேரத்தில் கொண்டு செல்ல முடியும் என்று ஆய்வு செய்தார்.

அப்போது, நகராட்சி தலைவர் அழகுசுந்தரவள்ளி, தாசில்தார் அருள்முருகன், நகராட்சி ஆணையாளர் (பொ) வெங்கடாசலம், நகராட்சி பணியாளர்கள் உடன் இருந்தனர்.