கோத்தகிரி பிக் மாஸ்டர்ஸ் அணி வெற்றி

கோத்தகிரி

நீலகிரி மாவட்ட கிரிக்கெட் சங்கம் சார்பில், மாவட்ட அளவிலான ஏ, பி மற்றும் சி டிவிஷன் கிரிக்கெட் போட்டிகள் கோத்தகிரி காந்தி மைதானத்தில் நடைபெற்று வருகிறது. இந்தநிலையில் நேற்று நடைபெற்ற சி டிவிஷன் பிரிவிற்கான லீக் போட்டியில் பி.எம். கிங்ஸ் அணியும், கோத்தகிரி பிக் மாஸ்டர்ஸ் அணியும் மோதியது. இந்த போட்டியில் டாஸ் வென்று முதலில் பேட்டிங் செய்த பி.எம். கிங்ஸ் அணி நிர்ணயிக்கப்பட்ட 35 ஓவர்களில் 30.5 ஓவர்கள் விளையாடி அனைத்து விக்கெட்டுகளையும் இழந்து 162 ரன்கள் எடுத்தது. இந்த அணி வீரர்கள் சுந்தர்ராஜ் 37 ரன்கள், செந்தில் குமார் 25 ரன்கள் எடுத்தனர். பிக் மாஸ்டர்ஸ் அணியின் பந்து வீச்சாளர் மணி 3 விக்கெட்டுகளை வீழ்த்தினார். இதைத்தொடர்ந்து 210 பந்துகளில் 163 ரன்கள் எடுத்தால் வெற்றி என்ற இலக்குடன் விளையாடிய கோத்தகிரி பிக் மாஸ்டர்ஸ் அணி 17.3 ஓவர்களில் 2 விக்கெட்டுகளை இழந்து வெற்றி இலக்கை எட்டியது. இந்த அணி வீரர் சபிக் 3 சிக்சர்கள், 18 பவுண்டரிகளை விளாசி 107 ரன்களுடன் சதம் அடித்து அவுட்டாகாமல் இருந்தார். மற்றொரு வீரர் மணி 33 ரன்கள் (அவுட் இல்லை) எடுத்தார். இதன் மூலம் 8 விக்கெட்டுகள் வித்தியாசத்தில் கோத்தகிரி பிக் மாஸ்டர்ஸ் அணி அபார வெற்றி பெற்றது.