மயிலாடுதுறை நகரசபை கூட்டம்

மயிலாடுதுறை நகரசபை கூட்டம் அதன் தலைவர் செல்வராஜ் தலைமையில் நடந்தது. நகராட்சி ஆணையர் செல்வபாலாஜி முன்னிலை வகித்தார். கூட்டத்தில் பல்வேறு தீர்மானங்கள் நிறைவேற்றப்பட்டன.

கூட்டத்தில் உறுப்பினர்கள் பேசியதாவது:-

இலக்கியா (தி.மு.க.): கூட்டம் 1 மணி நேரம் தாமதமாக தொடங்கியுள்ளது. இனி, குறிப்பிட்ட நேரத்தில் கூட்டத்தை தொடங்க வேண்டும்.

ரமேஷ் (தி.மு.க.): பூம்புகார் சாலையில் பாதாள சாக்கடை கழிவுநீர் வெளியேறி வடிகால் வாய்க்காலில் தேங்கி நிற்கிறது.

சம்பத் (தி.மு.க.): கிட்டப்பா பாலம் சுடுகாட்டில் கருமாதி மண்டபம் கட்டித் தர வேண்டும்.

குடிநீர் இணைப்பு

ரத்தினவேல் (தி.மு.க.): திருமஞ்சனவீதி, எடத்தெரு சந்திப்பில் தனியார் பால் பண்ணை எதிரில் பாதாள சாக்கடை கழிவுநீர் வெளியேறி மழைநீர் வடிகாலில் சென்று நீர் நிலைகளில் கலக்கிறது.

கீதா(தி.மு.க.): சிவசக்தி நகரில் உள்ள குடியிருப்புகளுக்கு குடிநீர் இணைப்பு வழங்க வேண்டும்.

தனலட்சுமி (அ.தி.மு.க.): ஆர்.பி.என். நகரில் இருந்து அண்ணாநகர் செல்லும் சாலையை சீரமைக்க வேண்டும்.

காந்தி (பா.ம.க): ஆனந்த தாண்டவபுரம் சாலையில் உள்ள குப்பை கிடங்கில் பல லட்சம் மதிப்புள்ள எந்திரங்கள் செயல்படுத்தப்படாமல் வீணாக வைக்கப்பட்டுள்ளது.

சணல் குமார் (நகராட்சி பொறியாளர்) : ஆட்கள் பற்றாக்குறையின் காரணமாக அந்த எந்திரங்கள் இயக்கப்படாமல் உள்ளது. அடுத்த மாதத்தில் இருந்து மீண்டும் இயக்கப்படும்.

பாதாள சாக்கடை கழிவுநீர்

ராமச்சந்திரன்(அ.தி.மு.க.): எனது வார்டில் மலேரியா காய்ச்சலால் ஒருவர் பாதிக்கப்பட்டதையடுத்து தெருக்களை சுத்தம் செய்ய வேண்டும்.

ரஜினி (தி.மு.க.): ரயிலடி வடுகத்தெருவில் பாதாள சாக்கடை கழிவுநீர் வெளியேறி சாலையில் தேங்கி நிற்கிறது.

கணேசன் (ம.தி.மு.க.): திருவிழந்தூர் ஆராயத்தெருவில் பாதாள சாக்கடை கழிவு நீர் வெளியேறி வருகிறது.

கல்யாணி ரகு (தி.மு.க.): திருவிழந்தூர் அம்பேத்கர் நகரில் குழாய்களில் ஏற்பட்ட உடைப்பின் காரணமாக பாதாள சாக்கடை கழிவு நீரும், குடிநீரும் ஒன்றாக கலந்து வருகிறது.

ஜெயந்தி (அ.தி.மு.க.): காமராஜர் பஸ் நிலையத்தில் உள்ள தாய்மார்கள் பாலூட்டும் அறை சுகாதாரமின்றி மோசமான நிலையில் உள்ளது.

இதேபோல உறுப்பினர்கள் பலர் தங்களது கோரிக்கைகள் குறித்து பேசினர்.

ரூ.24 கோடியில் பஸ் நிலையம்

தலைவர்: உறுப்பினர்களின் அனைத்து ேகாரிக்கைகளும் பரிசீலிக்கப்பட்டு படிப்படியாக நிறைவேற்றி தரப்படும். மயிலாடுதுறை அருகே மணக்குடியில் ரூ.24 கோடியில் புதிய ஒருங்கிணைந்த பஸ் நிலையம் அமைக்க வருகிற செப்டம்பர் 9-ந்தேதி டெண்டர் விடப்பட உள்ளது என்றார்.

முடிவில் நகரசபை துணைத்தலைவர் சிவகுமார் நன்றி கூறினார்.