ஓமலூர்-மேட்டூர் அணை இரட்டை ரெயில் பாதை பணி: தர்மபுரி, ஓசூர் வழியாக செல்லாமல் 2 ரெயில்கள் மாற்றுப்பாதையில் இயக்கம்

சூரமங்கலம்:

ஓமலூர்-மேட்டூர் அணை இடையே இரட்டை ரெயில் பாதை அமைப்பதற்கான பணி முழு வீச்சில் நடைபெற்று வருகிறது. இதையொட்டி சேலம் வழியாக செல்லும் 2 ரெயில்கள் தர்மபுரி, ஓசூர் வழியாக செல்லாமல் மாற்றுப்பாதையில் இயக்கப்படும் என ரெயில்வே நிர்வாகம் அறிவித்து உள்ளது.

அதன்படி கோவை-லோக்மான்ய திலக் எக்ஸ்பிரஸ் ரெயில் (வண்டி எண்-11014) வருகிற 28-ந் தேதி கோவை ரெயில் நிலையத்தில் இருந்து காலை 8.50 மணிக்கு புறப்பட்டு சேலம், திருப்பத்தூர், பங்காருபேட்டை வழியாக இயக்கப்படும். இந்த ரெயில் தர்மபுரி, ஓசூர் வழியாக இயங்காது.

இதேபோல் எர்ணாகுளம்- கே.எஸ்.ஆர் பெங்களூரு இன்டர்சிட்டி எக்ஸ்பிரஸ் ரெயில் (வண்டி எண்-12678) வருகிற 28-ந் தேதி எர்ணாகுளம் ரெயில் நிலையத்தில் இருந்து காலை 9.10 மணிக்கு புறப்பட்டு சேலம், திருப்பத்தூர் பங்காருபேட்டை, பையப்பனப்பள்ளி வழியாக இயக்கப்படும். இந்த ரெயில் தர்மபுரி, ஓசூர் கர்மேலரம் வழியாக இயங்காது. இந்த தகவல் சேலம் ரெயில்வே கோட்ட அலுவலக செய்திக்குறிப்பில் தெரிவிக்கப்பட்டுள்ளது.