மாணவ-மாணவிகளுக்கு பேச்சுப்போட்டி

திருப்பூர்

திருப்பூர் மாவட்டத்தில் தமிழ் வளர்ச்சித்துறையின் சார்பில் பேரறிஞர் அண்ணா பிறந்தநாளான வருகிற 15-ந் தேதி, தந்தை பெரியார் பிறந்தநாளான வருகிற 17-ந் தேதி ஆகிய நாட்களில் திருப்பூர் கலெக்டர் அலுவலகத்தில் உள்ள கூட்ட அரங்கில் காலை 10 மணிக்கு பள்ளி மாணவ-மாணவிகளுக்கும், மதியம் 2 மணிக்கு கல்லூரி மாணவர்களுக்கும் பேச்சுப்போட்டி நடைபெற உள்ளது.

பேரறிஞர் அண்ணா பிறந்தநாள் பேச்சுப்போட்டிக்கு பள்ளி மாணவர்களுக்கு, தாய் மண்ணிற்கு பெயர் சூட்டிய தனயன், மாணவர்க்கு அண்ணா, அண்ணாவின் மேடைத்தமிழ், அண்ணா வழியில் அயராது உழைப்போம், கல்லூரி மாணவர்களுக்கு பேரறிஞர் அண்ணாவும், தமிழக மறுமலர்ச்சியும், பேரறிஞர் அண்ணாவின் சமுதாய சிந்தனைகள், அண்ணாவின் தமிழ் வளம், அண்ணாவின் அரிச்சுவட்டில், தம்பி-மக்களிடம் செல் ஆகிய தலைப்புகள் வழங்கப்பட்டுள்ளது.

தந்தை பெரியார் பிறந்தநாள் பேச்சுப்போட்டிக்கு பள்ளி மாணவர்களுக்கு தொண்டு செய்து பழுத்த பழம், தந்தை பெரியாரும் தமிழ் சமுதாயமும், தந்தை பெரியாரின் பகுத்தறிவு சிந்தனைகள், தந்தை பெரியார் காண விரும்பிய உலக சமுதாயம், தந்தை பெரியாரும் பெண் விடுதலையும் என்ற தலைப்பிலும், கல்லூரி மாணவர்களுக்கு தந்தை பெரியாரும் பெண் விடுதலையும், தந்தை பெரியாரும் மூடநம்பிக்கை ஒழிப்பும், பெண் ஏன் அடிமையானாள்?, சமுதாய விஞ்ஞானி பெரியார், இனிவரும் உலகம், உலக சிந்தனையாளர்களும், பெரியாரும் ஆகிய தலைப்புகள் வழங்கப்பட்டுள்ளது.

இந்த போட்டியில் பங்கேற்று வெற்றி பெறும் பள்ளி, கல்லூரி மாணவர்களுக்கு மாவட்ட அளவில் முதல் பரிசாக ரூ.5 ஆயிரம், 2-வது பரிசாக ரூ.3 ஆயிரம், 3-வது பரிசாக ரூ.2 ஆயிரம் வழங்கப்படுகிறது. அரசு பள்ளி மாணவர்கள் 2 பேருக்கு தலா ரூ.2 ஆயிரம் சிறப்பு பரிசு வழங்கப்படும். மாவட்ட அளவிலான பள்ளி மாணவர்களுக்கான போட்டிக்கு முதன்மை கல்வி அலுவலராலும், கல்லூரி போட்டிக்கு கல்லூரி கல்வி இணை இயக்குனராலும் தேர்வு செய்து அனுப்பப்படும் மாணவர்கள் மட்டுமே போட்டியில் கலந்து கொள்ள முடியும்.

இந்த தகவலை திருப்பூர் மாவட்ட கலெக்டர் வினீத் தெரிவித்துள்ளார்.

----