11, 12-ம் வகுப்பு மாணவ-மாணவிகளுக்கு இன்று கவிதை, கட்டுரை, பேச்சுப்போட்டிகள்

தமிழ் வளர்ச்சி துறையின் சார்பில் பெரம்பலூர் மாவட்டத்தை சேர்ந்த 11, 12-ம் வகுப்பு பயிலும் பள்ளி மாணவ-மாணவிகளிடையே பேச்சாற்றலையும், படைப்பாற்றலையும் வளர்க்கும் நோக்கில் கவிதை, கட்டுரை, பேச்சு போட்டிகள் இன்று (வெள்ளிக்கிழமை) காலை 9 மணியளவில் பெரம்பலூர் அரசு மேல்நிலைப்பள்ளியில் நடைபெறவுள்ளது. இப்போட்டியில் கலந்து கொள்வதற்கான விண்ணப்பம் மற்றும் விதிமுறைகள் மாவட்ட முதன்மை கல்வி அலுவலருக்கு அனுப்பி வைக்கப்படும். போட்டியில் கலந்து கொள்ள விருப்பம் உள்ள மாணவ-மாணவிகள் தங்கள் பள்ளியின் தலைமை ஆசிரியரை அணுகி விண்ணப்பத்தை பெற்று பூர்த்தி செய்து தலைமை ஆசிரியரின் ஒப்பம் பெற்று பள்ளி, முதன்மை கல்வி அலுவலகம் மூலமாக adtamildept@gmail.com என்ற மின்னஞ்சல் முகவரிக்கு அனுப்பி வைக்க வேண்டும். போட்டி நடைபெறும் நாளன்று பெரம்பலூர் அரசு மேல்நிலைப்பள்ளியில் காலை 9 மணிக்கு வருகை புரிந்து போட்டிகளில் கலந்து கொள்வதற்கான வருகை பதிவேட்டில் ஒப்பமிட வேண்டும். தலைமை ஆசிரியர்கள் ஒரு போட்டிக்கு ஒருவர் வீதம் 3 போட்டிகளுக்கு 3 பேரை மட்டும் ஒரு பள்ளியில் இருந்து அனுப்பி வைக்க வேண்டும். ஒவ்வொரு போட்டியிலும் வெற்றி பெறும் பள்ளி மாணவ-மாணவிகளுக்கு முதல் பரிசாக ரூ.10 ஆயிரமும், 2-ம் பரிசாக ரூ.7 ஆயிரமும், 3-ம் பரிசாக ரூ.5 ஆயிரமும் மற்றும் சான்றிதழ்களும் வழங்கப்படும். போட்டியில் முதல் பரிசு பெற்றவர்கள் மட்டும் மாநில அளவிலான கவிதை, கட்டுரை, பேச்சு போட்டிகளுக்கு அனுப்பி வைக்கப்படுவார்கள். மாநில போட்டிகள் தொடர்பான தகவல்கள் பின்னர் தெரிவிக்கப்படும். இந்த வாய்ப்பினை பள்ளியில் பயிலும் 11, 12-ம் வகுப்பு மாணவர்கள் பயன்படுத்திக் கொள்ள வேண்டும், என்று மாவட்ட கலெக்டர் கற்பகம் தெரிவித்துள்ளார்.