கிருஷ்ணகிரி மாவட்டத்தில்வெவ்வேறு இடங்களில் 3 இளம்பெண்கள் மாயம்

ஓசூர் தின்னூரை சேர்ந்தவர் 22 வயது இளம்பெண். திருமணம் ஆகாதவர். கடந்த 24-ந் தேதி வீட்டில் இருந்து வெளியே சென்றவர் வீடு திரும்பவில்லை. அவரை எங்கு தேடியும் கிடைக்கவில்லை. இதுகுறித்து அவரது பெற்றோர் ஓசூர் டவுன் போலீசில் புகார் செய்தனர். அதில் சேலம் அம்மாபேட்டையை சேர்ந்த சுஜித் (வயது 27) என்பவர் மீது சந்தேகம் உள்ளதாக கூறியுள்ளனர். அதன்பேரில் ஓசூர் டவுன் போலீசார் விசாரணை நடத்தி வருகிறார்கள்.

தேன்கனிக்கோட்டை தாலுகா கலுகொண்டப்பள்ளியை சேர்ந்தவர் 24 வயது இளம்பெண். திருமணம் ஆனவர். குடும்ப பிரச்சினை காரணமாக கணவரை பிரிந்து கடந்த 2 ஆண்டுகளாக தனது பெற்றோர் வீட்டில் வசித்து வந்தார். இந்த நிலையில் கடந்த 23-ந் தேதி வீட்டில் இருந்து வெளியே சென்றவர் வீடு திரும்பவில்லை. இதுகுறித்து இளம்பெண்ணின் பெற்றோர் மத்திகிரி போலீசில் புகார் செய்தனர். அதன்பேரில் போலீசார் வழக்குப்பதிவு செய்து விசாரணை நடத்தி வருகின்றனர்.

தர்மபுரி மாவட்டம் பாலக்கோடு அருகே உள்ள கிராமத்தை சேர்ந்தவர் 21 வயது இளம்பெண். திருமணம் ஆகாதவர். இவர் கர்னூர் பழைய ஆனேக்கல் சாலையில் பெண்கள் விடுதியில் தங்கி தனியார் நிறுவனத்தில் வேலை செய்து வந்தார். இந்த நிலையில் கடந்த 22-ந் தேதி விடுதியில் இருந்து வெளியே சென்ற இளம்பெண் வீடு திரும்பவில்லை. இதுகுறித்து அவரது பெற்றோர் மத்திகிரி போலீசில் புகார் செய்தனர். அதன்பேரில் போலீசார் வழக்குப்பதிவு செய்து விசாரணை நடத்தி வருகின்றனர்.