மோட்டார் சைக்கிள் விபத்தில் ரெயில் என்ஜின் டிரைவர் சாவு

பேட்டை:

நெல்லை அருகே சுத்தமல்லி யாதவர் மேலத்தெருவை சேர்ந்தவர் சுப்பிரமணியன் மகன் பாலகணேஷ் (வயது 32). இவர் நெல்லையில் ெரயில் என்ஜின் டிரைவராக வேலை பார்த்து வந்தார். இவருக்கு மனைவி மற்றும் மகன், மகள் உள்ளனர். நேற்று முன்தினம் இரவு சுத்தமல்லி விலக்கில் உள்ள ஏ.டி.எம். எந்திரத்தில் பணம் எடுத்து விட்டு மோட்டார் சைக்கிளில் வீடு திரும்பிக் கொண்டிருந்தார்.

சுத்தமல்லி போலீஸ் நிலையம் அருகே சென்றபோது எதிர்பாராதவிதமாக சாலையோரம் பள்ளத்தில் கீழே விழுந்ததில் பலத்த காயம் அடைந்தார். அக்கம்பக்கத்தினர் அவரை மீட்டு பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர். அவரை பரிசோதித்த டாக்டர்கள், பாலகணேஷ் ஏற்கனவே இறந்துவிட்டதாக தெரிவித்தனர். அவரது உடல் பிரேத பரிசோதனைக்கு அனுப்பி வைக்கப்பட்டது. மேலும் இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.