சரக்கு வாகனத்தின் மீது மோதல்; மோட்டார் சைக்கிளில் சென்றவர் பலி

நாமக்கல் தில்லை நகரை சேர்ந்தவர் ரவி (வயது 55). இவர் நேற்று முன்தினம் இரவு சொந்த பணியை முடித்து விட்டு மோட்டார் சைக்கிளில் வீட்டுக்கு திரும்பி வந்து கொண்டு இருந்தார். நாமக்கல் - திருச்சி சாலையில் வந்தபோது முன்னால் சென்ற சரக்கு வாகனத்தின் டிரைவர் திடீரென பிரேக் போட்டு உள்ளார். இதில் ரவி ஓட்டி வந்த மோட்டார் சைக்கிள் எதிர்பாராதவிதமாக சரக்கு வாகனத்தின் மீது மோதியது. இந்த விபத்தில் படுகாயம் அடைந்த ரவியை அக்கம்பக்கத்தில் உள்ளவர்கள் மீட்டு நாமக்கல்லில் உள்ள தனியார் ஆஸ்பத்திரி ஒன்றில் சேர்த்தனர். பின்னர் அவர் மேல்சிகிச்சைக்காக நாமக்கல் அரசு மருத்துவக்கல்லூரி மருத்துவமனையில் சேர்க்கப்பட்டார். இங்கு அவரை பரிசோதனை செய்த டாக்டர்கள் அவர் ஏற்கனவே இறந்து விட்டதாக கூறினர்.

இந்த விபத்து குறித்து அவரது மனைவி தங்கமணி நாமக்கல் போலீசில் புகார் செய்தார். அதன்பேரில் போலீசார் வழக்குப்பதிவு செய்து விசாரணை நடத்தி வருகின்றனர்.