உழவர் சந்தைகளில் ரூ.99½ லட்சத்துக்கு காய்கறி விற்பனை

ஆடி அமாவாசையையொட்டி மாவட்டத்தில் உள்ள உழவர் சந்தைகளில் ரூ.99½ லட்சத்துக்கு காய்கறிகள் விற்பனை செய்யப்பட்டன.

ஆடி அமாவாசை

சேலம் மாவட்டத்தில் சூரமங்கலம், தாதகாப்பட்டி, அஸ்தம்பட்டி, அம்மாபேட்டை, ஆத்தூர், மேட்டூர், ஜலகண்டாபுரம், எடப்பாடி, இளம்பிள்ளை, தம்மம்பட்டி, ஆட்டையாம்பட்டி ஆகிய 11 உழவர் சந்தைகள் செயல்பட்டு வருகின்றன. இந்த சந்தைகளுக்கு விவசாயிகள் தங்கள் விளைநிலங்களில் விளைச்சல் அடைந்த காய்கறிகள் மற்றும் பழங்களை விற்பனைக்கு கொண்டு வருகிறார்கள்.

இந்த நிலையில் நேற்று ஆடி அமாவாசையையொட்டி உழவர் சந்தைகளில் காய்கறிகள் வாங்குவோரின் எண்ணிக்கை வழக்கத்தைவிட அதிகமாக காணப்பட்டது. குறிப்பாக சந்தையில் அகத்திக்கீரை, வாழை இலை, வாழைப்பழம், கத்தரிக்காய், அவரைக்காய், பூசணிக்காய், வெள்ளை பூசணிக்காய் போன்றவைகள் அதிக அளவில் விற்பனையானது.

ரூ.ரூ.99½ லட்சத்துக்கு விற்பனை

இதுகுறித்து வேளாண் அதிகாரிகள் கூறும் போது, ஆடி அமாவாசையையொட்டி உழவர் சந்தைகளுக்கு விவசாயிகள் கூடுதலாக காய்கறிகள் மற்றும் பழங்களை விற்பனைக்காக கொண்டு வந்தனர். மாவட்டத்தில் உள்ள 11 உழவர் சந்தைகளுக்கு 951 விவசாயிகள் மொத்தமாக 233 டன் காய்கறிகள் மற்றும் பழங்கள் விற்பனைக்காக கொண்டு வந்தனர். இதன் மூலம் ரூ.99 லட்ட்சத்து 52 ஆயிரத்து 386-க்கு விற்பனையானது. 56 ஆயிரத்து 427 பேர் உழவர் சந்தைகளுக்கு வந்து பொருட்களை வாங்கி சென்றதாக தெரிவித்தனர்.

இதேபோல் சேலம் பால் மார்க்கெட், ஆற்றோர மார்க்கெட் உள்ளிட்ட அனைத்து மார்க்கெட்டுகளிலும் நேற்று காய்கறி, பழங்கள் வாங்க மக்கள் கூட்டம் அலைமோதியது.