சிவகங்கை மன்னர் துரைசிங்கம் அரசு கல்லூரியில் காலி இடங்களுக்கு மாணவர் சேர்க்கை

சிவகங்கை மன்னர் துரைசிங்கம் அரசு கலைக் கல்லூரி முதல்வர் துரையரசன் வெளியிட்டுள்ள செய்திக்குறிப்பில் கூறியுள்ளதாவது:- சிவகங்கை மன்னர் துரைசிங்கம் அரசு கலைக் கல்லூரியில் 2023-2024-ம் கல்வி ஆண்டில் இளநிலை மாணவ, மாணவிகள் சேர்க்கைக்கான இறுதிக்கட்ட கலந்தாய்வு நடைபெற்று முடிந்துள்ளது. மீதி உள்ள காலியிடங்களுக்கு உரிய விதிமுறைகளின் படி இன்று(வெள்ளிக்கிழமை) புதிய விண்ணப்பங்கள் வழங்கி வராண்டா சேர்க்கை நடைபெறுகிறது. எனவே இந்த கல்லூரியில் சேர விரும்பும் மாணவ, மாணவிகள் இந்த வாய்ப்பினை பயன்படுத்தி கொள்ள வேண்டும். மாணவ, மாணவிகள் இணைய வழி விண்ணப்பத்தின் நகல், பிளஸ்-2 மாற்று சான்றிதழ், சாதி சான்றிதழ், 10,11 மற்றும் 12-ம் வகுப்பு மதிப்பெண் சான்றிதழ், வருமான சான்றிதழ் அசல் மற்றும் புகைப்பட நகல்கள் ஆகியவைகளுடன் 3 பாஸ்போர்ட் அளவு புகைப்படங்களையும் கொண்டு வர வேண்டும். இவ்வாறு அதில் கூறப்பட்டுள்ளது.