திருச்சி மாநகராட்சி அலுவலகத்தில் முதல்-அமைச்சர் மு.க.ஸ்டாலின் திடீர் ஆய்வு

திருச்சி,

டெல்டா மாவட்டங்களான தஞ்சாவூர், திருவாரூர், நாகப்பட்டினம் ஆகிய மாவட்டங்களில் ஆறுகள், வாய்க்கால்களில் தூர்வாரும் பணிகள் நடைபெற்று வருகிறது. இந்த பணிகளை ஆய்வு செய்வதற்காக முதல்-அமைச்சர் மு.க.ஸ்டாலின் 2 நாள் பயணமாக சென்னையில் இருந்து நேற்று காலை விமானம் மூலம் திருச்சி சென்றார்.

விமான நிலையத்தில் அவரை அமைச்சர்கள் கே.என்.நேரு, அன்பில் மகேஷ் பொய்யாமொழி, எ.வ.வேலு, ரகுபதி, மெய்யநாதன், திருச்சி மாநகராட்சி மேயர் அன்பழகன், தமிழக அரசின் டெல்லி பிரதிநிதி ஏ.கே.எஸ்.விஜயன், திருச்சி மாவட்ட கலெக்டர் சிவராசு மற்றும் எம்.பி., எம்.எல்.ஏ.க்கள் உள்ளிட்ட அதிகாரிகள் வரவேற்றனர்.

பாதாள சாக்கடைப்பணி ஆய்வு

பின்னர் அங்கிருந்து காரில் புறப்பட்ட முதல்-அமைச்சர் மு.க.ஸ்டாலின், திருச்சி உறையூரில் உள்ள கழக வெளியீட்டு செயலாளர் திருச்சி செல்வேந்திரன் வீட்டிற்கு சென்றார். அங்கு உடல் நலக்குறைவால் வீட்டில் இருந்தபடி சிகிச்சை பெற்று வரும் அவரை சந்தித்து உடல்நலம் விசாரித்தார்.

பின்னர் அங்கிருந்து புறப்பட்டு வரும்போது, உறையூர் செல்லும் வழியில் பாதாள சாக்கடை திட்டப்பணிகளை பார்வையிட்டார். மேலும் அங்கு குண்டும், குழியுமாக காட்சி அளித்த சாலைகளையும் செப்பனிட்டு சீரமைக்க அதிகாரிகளுக்கு உத்தரவு பிறப்பித்தார்.

மாநகராட்சியில் திடீர் ஆய்வு

அங்கிருந்து அரசினர் சுற்றுலா மாளிகைக்கு செல்லும் வழியில் பாரதிதாசன் சாலையில் உள்ள மாநகராட்சி மைய அலுவலகத்திற்குள் யாரும் எதிர்பாராத வகையில் முதல்-அமைச்சர் மு.க.ஸ்டாலின் வந்த கார் திடீரென்று சென்றது. அங்கு மாநகராட்சி கமிஷனர் அறைக்கு முதல்-அமைச்சர் மு.க.ஸ்டாலின் சென்று திடீர் ஆய்வு மேற்கொண்டார்.

நேற்று காலை 10 மணிக்குதான் திருச்சி மாநகராட்சியின் 2022-23-ம் ஆண்டுக்கான பட்ஜெட் தாக்கல் செய்யப்பட்டு இருந்தது. இந்த நிலையில் முதல்-அமைச்சர் மு.க.ஸ்டாலின் அங்கு ஆய்வு மேற்கொண்டது அதிகாரிகள், ஊழியர்களிடையே பரபரப்பை ஏற்படுத்தியது.

திட்டப்பணிகள் குறித்து கேட்டறிந்தார்

அங்கு கமிஷனர் அறையில் நாற்காலியில் அமர்ந்த மு.க.ஸ்டாலின், மாநகராட்சி கமிஷனர் முஜிபுர் ரகுமான் மற்றும் அதிகாரிகளை அழைத்து பட்ஜெட் குறித்த விவரங்கள் மற்றும் பணிகள் குறித்து கேட்டறிந்தார். மேலும் வருகை பதிவேடு உள்ளிட்ட இதர பதிவேடுகளையும் ஆய்வு செய்தார்.

அத்துடன் மாநகராட்சி மருத்துவமனைகள், சுகாதார மையங்களின் செயல்பாடுகள் குறித்தும், ஒருங்கிணைந்த புதிய பஸ் நிலையம் அமைக்கும் பணியின் நிலை மற்றும் ஸ்மார்ட் சிட்டி திட்டப்பணிகள் குறித்தும் கேட்டறிந்தார்.

பொதுமக்களிடம் குறைகேட்பு

இதையடுத்து பொதுமக்களை வரவழைத்து அவர்களிடம் குறைகளை கேட்டு மனுக்களை பெற்றுக்கொண்டார்.