ஏற்காட்டுக்கு திருமணத்திற்கு சென்று திரும்பியபோதுசரக்கு வேன் மரத்தில் மோதி டிரைவர் உள்பட 24 பேர் காயம்

ஏற்காடு

ஏற்காட்டுக்கு திருமணத்திற்கு சென்று திரும்பியபோது சரக்கு வேன் மரத்தில் மோதிய விபத்தில் டிரைவர் உள்பட 24 பேர் காயம் அடைந்தனர்.

உறவினர் திருமணத்திற்கு...

ஏற்காடு செந்திட்டு கிராமத்தை சேர்ந்த ஒரு பெண்ணுக்கும், ஏற்காடு மோட்டூர் கிராமத்தை சேர்ந்த ஒருவருக்கும் நேற்று திருமணம் நடைபெற்றது. இந்த திருமணத்திற்கு செந்திட்டு, அரங்கம், பெலாக்காடு, மாரமங்களம், நார்த்தஞ்சேடு கிராமங்களை சேர்ந்த மணப்பெண்ணின் உறவினர்கள் 23 பேர் மோட்டூர் கிராமத்திற்கு சரக்கு வேனில் சென்றனர். வேனை சுப்பிரமணி (வயது40) என்பவர் ஓட்டிச் சென்றார். திருமணம் முடிந்த பின்னர் அவர்கள் மீண்டும் ஊருக்கு திரும்பினர்.

வாழவந்தி கிரயத்தை தாண்டி ஆத்துப்பாலம் பகுதியில் வந்தபோது திடீரென வேனின் ஆக்ஸல் உடைந்தது. இதனால் டிரைவரின் கட்டுப்பாட்டை இழந்து வேன் தறிகெட்டு ஓடி சாலையோரம் இருந்த மரத்தில் மோதியது. இந்த விபத்தில் வேனில் சென்ற பழனியம்மாள் (58), ராணி (60), வருதாயி (52), ஆண்டிச்சி (62), வெங்கடேஷ் (14), வெள்ளாயி (40), பழனியம்மாள் (50), ஆண்டி (60), அண்ணாமலைச்சி (58), மாரியம்மாள், லட்சுமி, அண்ணாமலை, டிரைவர் சுப்பிரமணி ஆகிய 13 பேர் படுகாயம் அடைந்தனர்.

போலீசார் விசாரணை

மேலும் மருதாயி, பரசுராம், செல்வநாதன், வனிதா, தர்மா, துளசிதாசன், புவனேஸ்வரன், நதியா, ஆனந்தி, ராமாயி, மாது ஆகியோர் லேசான காயம் அடைந்தனர். இதையடுத்து அந்த வழியாக சென்றவர்கள் காயமடைந்தவர்களை மீட்டு வாழவந்தி ஆரம்ப சுகாதார நிலையத்திற்கு அனுப்பி வைத்தனர்.

பின்னர் படுகாயம் அடைந்த 13 பேர் மேல்சிகிச்சைக்காக சேலம் அரசு மருத்துவமனைக்கு அனுப்பி வைக்கப்பட்டனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இந்த விபத்து குறித்து ஏற்காடு போலீசார் வழக்குப்பதிவு செய்து விசாரணை நடத்தி வருகின்றனர்.