சேலத்தில் பூக்கள் விலை கடும் உயர்வு

தீபாவளி பண்டிகையை முன்னிட்டு சேலத்தில் பூக்கள் விலை கடுமையாக உயர்ந்துள்ளது.

கூட்டம்

தீபாவளி பண்டிகை இன்று (திங்கட்கிழமை) கொண்டாடப்படுகிறது. இதையொட்டி சேலம் வ.உ.சி மார்க்கெட்டில் நேற்று பூ வியாபாரிகளின் கூட்டம் அதிகமாக காணப்பட்டது. பூக்களின் விலையும் கிடுகிடுவென உயர்ந்தது. தீபாவளிக்கு பூக்களின் தேவைப்பாடு அதிகமாக இருக்கும் என்பதால் பொதுமக்கள் அதிகளவில் பூ மார்க்கெட்டிற்கு வந்து தங்களுக்கு தேவையான பூக்களை வாங்கி சென்றனர்.

இதனால் பூக்கள் விற்பனை படுஜோராக நடந்தது. அதே நேரத்தில் பூக்கள் விலை கடுமையாக உயர்ந்துள்ளது. நேற்று முன்தினம் குண்டு மல்லி ஒரு கிலோ ரூ.1,000-க்கு விற்கப்பட்டது. ஆனால் நேற்று ரூ.200 உயர்ந்து கிலோ ரூ.1,200-க்கு விற்பனையானது. இருப்பினும் விலை உயர்வை பொருட்படுத்தாமல் சிலர் குண்டு மல்லியை வாங்கி சென்றனர்.

மகிழ்ச்சி

மேலும், முல்லைப்பூ ஒரு கிலோ ரூ.1,200-ம், ஜாதி மல்லி ரூ.800-ம், காக்கட்டான் ரூ.600-ம், அரளி ரூ.200-ம், நந்தி வட்டம் ரூ.160-ம், நந்தியாவட்டம் ரூ.120 மற்றும் சம்பங்கி ரூ.70-க்கும் விற்பனை செய்யப்பட்டது. பூக்கள் விலை உயர்வால் பூ விவசாயிகள் மகிழ்ச்சி அடைந்தனர்.