சரக்கு வேன் துணிகர திருட்டு

தர்மபுரி:

தர்மபுரி மாவட்டம் பச்சனம்பட்டி பகுதியை சேர்ந்தவர் பழனி (வயது 29). இவர் சரக்கு வேனை விலைக்கு வாங்கி வாடகைக்கு ஓட்டி வந்தார். இந்த வேனை சோகத்தூர் கூட்டு ரோடு பகுதியில் உள்ள ஒரு வணிக வளாகத்தின் அருகில் நிறுத்திவிட்டு செல்வது வழக்கம். கடந்த 2 நாட்களுக்கு முன்பு அந்தப் பகுதியில் சரக்கு வேனை நிறுத்திவிட்டு சென்றார். மீண்டும் வந்து பார்த்தபோது அந்த வேன் மாயமாகி இருந்தது. இந்த வேனின் மதிப்பு ரூ.2 லட்சம் ஆகும். வேன் மாயமானதால் அதிர்ச்சி அடைந்த பழனி இதுபற்றி தர்மபுரி டவுன் போலீஸ் நிலையத்தில் புகார் அளித்தார். அதன் பேரில் போலீசார், சரக்கு வேன் திருட்டு நடந்த இடத்தை பார்வையிட்டு விசாரணை நடத்தினார்கள். அப்போது அந்தப் பகுதியில் உள்ள கண்காணிப்பு கேமராக்களில் சம்பவ நாளில் பதிவாகி இருந்த காட்சிகளை ஆய்வு செய்தனர். அப்போது அந்த சரக்கு வேனை மர்ம நபர்கள் துணிகரமாக திருடி சென்றிருப்பது தெரியவந்தது. இதை தொடர்ந்து தர்மபுரி டவுன் போலீசார் இந்த திருட்டு சம்பவம் தொடர்பாக வழக்குப்பதிவு செய்தனர். சரக்கு வேனை திருடிச் சென்ற மர்ம நபர்கள் யார்? என்பது குறித்து தீவிர விசாரணை நடத்தி வருகிறார்கள்.