புதுக்கோட்டை மாவட்டத்தில் சிறந்த போலீஸ் நிலையமாக திருக்கோகர்ணம் தேர்வு

தமிழகத்தில் போலீஸ் நிலையங்களின் செயல்பாடுகள் மற்றும் குற்றங்களை தடுத்தல், சட்டம்-ஒழுங்கு, வழக்குகள், கைது நடவடிக்கைகள் உள்பட பல்வேறு பணிகளை ஆராய்ந்து விருதுகள் வழங்கப்படுவது உண்டு. அந்த வகையில் கடந்த 2021-ம் ஆண்டின் செயல்பாட்டில் தமிழகத்தில் முதல் 3 இடங்களில் சிறந்த போலீஸ் நிலையங்கள் தேர்வு செய்யப்பட்டு ஏற்கனவே விருது வழங்கப்பட்டன. அதனைதொடர்ந்து மாவட்டங்களில் சிறந்த போலீஸ் நிலையங்கள் தேர்வு செய்யப்பட்டு அறிவிக்கப்பட்டுள்ளது.

அந்த அடிப்படையில் புதுக்கோட்டை மாவட்டத்தில் திருக்கோகர்ணம் போலீஸ் நிலையம் கடந்த 2021-ம் ஆண்டு சிறந்த போலீஸ் நிலையமாக தேர்வு செய்யப்பட்டுள்ளது. இதையொட்டி இந்த போலீஸ் நிலையத்தின் இன்ஸ்பெக்டர் ரமேஷ் மற்றும் போலீசாருக்கு போலீஸ் துறையினர் வாழ்த்து தெரிவித்து வருகின்றனர். இதேபோல் அந்தந்த மாவட்டங்களில் சிறந்த போலீஸ் நிலையங்கள் தேர்வு செய்யப்பட்டுள்ளது குறிப்பிடத்தக்கது.