டோக்கன் வழங்கும் பணி 90 சதவீதம் நிறைவு

பொள்ளாச்சி

பொங்கல் பரிசு தொகுப்பு பெற டோக்கன் வழங்கும் பணி 90 சதவீதம் நிறைவு பெற்று உள்ளது. மேலும் ரேஷன் கடைகளுக்கு கரும்புகள் வந்து சேர்ந்தது.

பொங்கல் தொகுப்பு

பொங்கல் பண்டிகை வருகிற 15-ந் தேதி கொண்டாடப்படுகிறது. இதையொட்டி ரேஷன் கார்டுதாரர்களுக்கு ஒரு கிலோ பச்சரிசி, ஒரு கிலோ சர்க்கரை, ஒரு முழுக்கரும்பு மற்றும் ரூ.1,000 ரொக்கம் ஆகியவை கொண்ட பரிசு தொகுப்பு வழங்கப்படும் என்று அரசு அறிவித்து உள்ளது. இது நாளை (திங்கட்கிழமை) முதல் ரேஷன் கடைகளில் வழங்கப்படுகிறது.

ரேஷன் கடைகளில் கூட்ட நெரிசலை தடுக்க ஊழியர்கள் வீடு, வீடாக சென்று டோக்கன் வழங்கி வருகின்றனர். இந்த நிலையில் நேற்று முன்தினம் கரும்புகள் கொண்டு வரப்பட்டன. இதை தொடர்ந்து நேற்று முதல் ரேஷன் கடைகளுக்கு கரும்புகள் அனுப்பி வைக்கப்பட்டது. இதுகுறித்து குடிமைப்பொருள் அதிகாரிகள் கூறியதாவது:-

90 சதவீதம் நிறைவு

ஒரு நாளைக்கு 200 முதல் 250 டோக்கன் வரை வழங்கப்படுகிறது. பொள்ளாச்சி தாலுகாவில் 168 ரேஷன் கடைகள் செயல்பட்டு வருகின்றன. அரசு அறிவித்து உள்ள பொங்கல் தொகுப்பு 93 ஆயிரத்து 929 ரேஷன் கார்டுதாரர்களுக்கு வழங்கப்படுகிறது. நேற்று வரை 83 ஆயிரத்து 900 பேருக்கு டோக்கன் வழங்கப்பட்டு உள்ளது. இந்த பணிகள் 90 சதவீதம் நிறைவு பெற்று உள்ளது. மேலும் ரேஷன் கடைகளுக்கு தேவையான கரும்புகளை அனுப்பி வைக்கும் பணியும் நடைபெற்று வருகிறது. நாளை முதல் ரேஷன் கடைகளில் பொங்கல் பரிசு தொகுப்பு வழங்கப்படும். இதற்கான டோக்கன் வழங்கும் பணி இன்றுடன்(ஞாயிற்றுக்கிழமை) நிறைவு பெறுகிறது. பொங்கல் பரிசு தொகுப்பு சரியான அடை அளவில், தரமானதாக வழங்க வேண்டும் என்று அறிவுறுத்தப்பட்டு உள்ளது.

இவ்வாறு அவர்கள் கூறினார்கள்.