மாவட்ட அளவிலான இறகுப்பந்து போட்டி

தர்மபுரி மாவட்ட இறகு பந்து சங்கம் சார்பில் மாவட்ட அளவிலான இறகுப்பந்து போட்டி தர்மபுரியில் உள்ள மாவட்ட விளையாட்டு அரங்கில் நேற்று தொடங்கியது. முதல் கட்டமாக 11, 13, 15, 19 வயதுக்குட்பட்ட மாணவ-மாணவிகளுக்கு போட்டி நடைபெற்றது. இந்த போட்டி தொடக்க விழாவுக்கு சங்க தலைவர் தண்டபாணி தலைமை தாங்கினார். செயலாளர் தனசேகர், மாவட்ட விளையாட்டு அலுவலர் சாந்தி ஆகியோர் முன்னிலை வகித்தனர். பொருளாளர் கோபி வரவேற்று பேசினார். தர்மபுரி நகர துணை போலீஸ் சூப்பிரண்டு வினோத் போட்டிகளை தொடங்கி வைத்து பேசினார். ஒற்றையர் மற்றும் இரட்டையர் பிரிவுகளில் நடைபெற்ற போட்டிகளில் மாவட்டம் முழுவதும் இருந்து 400-க்கும் மேற்பட்ட மாணவ-மாணவிகள் கலந்து கொண்டு விளையாடினர்.

இந்த நிகழ்ச்சியில் சங்க துணை தலைவர் சந்திரகுமார், இணைச்செயலாளர் துரைராஜ், பயிற்சியாளர் சந்தோஷ், நிர்வாகிகள் ராஜசேகர், சந்தோஷ்குமார், விஜய்சங்கர் உள்ளிட்ட ஏராளமான விளையாட்டு வீரர்கள் கலந்து கொண்டனர். இன்று (ஞாயிற்றுக்கிழமை) ஆண்களுக்கான ஒற்றையர் மற்றும் இரட்டையர் இறகுப்பந்து போட்டிகள் நடைபெற உள்ளன. இந்த போட்டிகளில் வெற்றி பெற்ற அணிகள் மற்றும் வீரர்களுக்கான பரிசு வழங்கும் விழா நடைபெற உள்ளது.