தேயிலை தோட்டத்தில் காட்டுயானைகள் முகாம்

வால்பாறை

வால்பாறையில் தேயிலை தோட்டத்தில் காட்டுயானைகள் முகாமிட்டன. இதனால் பச்சை தேயிலை பறிக்கும் பணி பாதிக்கப்பட்டது.

காட்டுயானைகள் நடமாட்டம்

வால்பாறையில் பல்வேறு எஸ்டேட் பகுதியில் காட்டு யானைகள் நடமாட்டம் அதிகரிக்க தொடங்கி வருகிறது. இதனால் மானாம்பள்ளி மற்றும் வால்பாறை வனச்சரக வனத்துறையினர் தொடர்ந்து கண்காணிப்பில் ஈடுபட்டு வருகின்றனர். இருந்தாலும், பல்வேறு எஸ்டேட் பகுதியில் காட்டு யானைகள் நடமாட்டம் இருந்து வருகிறது. இதனால் அனைத்து எஸ்டேட் பகுதி மக்களும் இரவு நேரத்திலும், அதிகாலை நேரத்திலும் பணிக்காக வெளியே செல்லும் போது கவனமாக இருந்து யானைகள் நடமாட்டம் உள்ளதா? என்பதை தெரிந்து கொண்டு வெளியே செல்ல வேண்டும் என்று வனத்துறையினர் எச்சரிக்கை விடுத்துள்ளனர்.

பணி பாதிப்பு

இந்த நிலையில் வால்பாறை அருகில் உள்ள முத்துமுடி எஸ்டேட் தேயிலை தோட்ட பகுதியில் 5 காட்டு யானைகள் கூட்டம் முகாமிட்டு நின்றது. இந்த யானைகள் தேயிலை தோட்ட பகுதியில் அங்குமிங்கும் ஓடிக் கொண்டிருந்தது. இதனால் அந்த பகுதியில் பச்சை தேயிலை பறிக்கும் பணி பாதிக்கப்பட்டது. எனினும் தொழிலாளர்கள் அருகில் உள்ள தேயிலை தோட்டங்களில் பணியை மேற்கொண்டனர்.

கவனமாக இருக்க வேண்டும்

இதுகுறித்து வனத்துறையினர் கூறியதாவது:-

கேரள வனப்பகுதியில் இருந்து வந்து கொண்டிருக்கும் யானைகள் தேயிலை தோட்டங்கள் வழியாகத்தான் வனப்பகுதிக்குள் செல்லும். எனவே எஸ்டேட் நிர்வாகத்தினர் காலையில் தொழிலாளர்களை பணிக்காக தேயிலை தோட்டங்களுக்கு அனுப்புவதற்கு முன் அந்த பகுதியில் பணியில் உள்ள வனப்பணியாளர்களை தொடர்பு கொண்டு காட்டு யானைகள் நடமாட்டம் இருக்கிறதா? என்பதை கேட்டறிந்த பிறகு பணிக்கு அனுப்ப வேண்டும். அதேபோல் காட்டு யானைகள் நடமாட்டம் உள்ள எஸ்டேட் பகுதியில் இயற்கை வன வள பாதுகாப்பு மையத்தின் மூலம் இரவில் சிவப்பு விளக்கு ஒளிர செய்யப்பட்டு வருகிறது. அவற்றையும் கருத்தில் கொண்டு எஸ்டேட் பகுதி மக்கள் கவனமாக இருக்க வேண்டும்.

இவ்வாறு அவர்கள் கூறினார்கள்.