திண்டிவனம் அருகேஓங்கூர் ஆற்றுப்பாலத்தில் கார் மோதி பெண் சாவு:கணவர், 2 மகன்கள் படுகாயம்

திண்டிவனம்,

திருச்சி தப்பேட்டையை அடுத்த பில்லாதுைற கிழக்கு தெருவை சேர்ந்த சங்கர் மகன் துரை (வயது 45). என்ஜினீயர். இவர் சென்னை நந்தியம்பாக்கம் பகுதியில் தங்கி பணியாற்றி வருகிறார். இவரது மனைவி ஈஸ்வரி (35). இவர்களுக்கு குகன்(22), யுவன்சங்கர் ராஜா(18) என்று 2 மகன்கள் உள்ளனர்.

இந்த நிலையில், யுவன்சங்கர்ராஜாவை சென்னையில் உள்ள பொறியியல் கல்லூரியில் சேர்க்க முடிவு செய்து இருந்ததாக தெரிகிறது. இதற்காக ஈஸ்வரி தனது மகன்களுடன் சென்னைக்கு சென்று நந்தியம்பாக்கத்தில் உள்ள வீட்டில் தங்கி உள்ளார்.

தடுப்புசுவரில் மோதியது

பின்னர் நேற்று அங்கிருந்து, துரை தனது குடும்பத்தினருடன் திருச்சிக்கு காரில் புறப்பட்டார். காரை குகன் ஓட்டினார். விழுப்புரம் மாவட்டம் திண்டிவனம் அடுத்த ஓங்கூர் ஆற்று பாலம் அருகில் வந்த போது கார் கட்டுப்பாட்டை இழந்து பாலத்தின் பக்கவாட்டில் உள்ள தடுப்பு சுவரில் மோதி விபத்தில் சிக்கியது.

இதில் காரில் வந்த 4 பேரும் படுகாயமடைந்தனர். அவர்களை அங்கிருந்தவர்கள் மீட்டு சிகிச்சைக்காக திண்டிவனம் அரசு மருத்துவமனைக்கு அனுப்பி வைத்தனர். அங்கு சிகிச்சை பலனின்றி ஈஸ்வரி இறந்து போனார்.

துரை, குகன், யுவன்சங்கர்ராஜா ஆகியோர் மேல் சிகிச்சைக்காக முண்டியம்பாக்கம் அரசு மருத்துவக்கல்லூரி மருத்துவமனைக்கு அனுப்பி வைக்கப்பட்டனர். அங்கு அவர்களுக்கு டாக்டர்கள் உரிய சிகிச்சை அளித்து வருகின்றனர்.

இதுகுறித்து ஒலக்கூர் போலீசார் விசாரித்து வருகின்றனர்.