திருவள்ளூர் அருகே ஓடும் ரெயிலில் இருந்து தவறி விழுந்த பெண் சாவு

திருத்தணியில் இருந்து மின்சார புறநகர் ரெயில் ஒன்று திருவள்ளூர் வழியாக சென்னை சென்ட்ரல் நோக்கி சென்று கொண்டிருந்தது. அந்த மின்சார ரெயில் திருவள்ளூரை அடுத்த வேப்பம்பட்டு திருநின்றவூர் ரெயில் நிலையங்களுக்கு இடையே சென்று கொண்டிருந்தபோது படிக்கட்டு அருகில் நின்று கொண்டிருந்த சுமார் 50 வயது மதிக்கத்தக்க பெண் ஒருவர் ஓடும் ரயிலிலிருந்து தவறி கீழே விழுந்தார்.

இதில் அவருக்கு தலை மற்றும் உடலில் பலத்த காயம் ஏற்பட்டு சம்பவ இடத்திலேயே பரிதாபமாக இறந்தார். இந்த சம்பவம் குறித்து திருவள்ளூர் ரெயில்வே சப்-இன்ஸ்பெக்டர் ரவிச்சந்திரன் தலைமையில் போலீசார் வழக்குப்பதிவு செய்து இறந்த பெண்ணின் உடலை கைப்பற்றி பிரேத பரிசோதனைக்காக திருவள்ளூர் அரசு ஆஸ்பத்திரிக்கு அனுப்பி வைத்தனர். இறந்த பெண் யார்? அவர் எந்த ஊரை சேர்ந்தவர்? என போலீசார் தொடர்ந்து விசாரித்து வருகிறார்கள்.