கார் மோதி தொழிலாளி பலி

சின்னசேலம்,

கள்ளக்குறிச்சி அடுத்த க.மாமனந்தல் மாரியம்மன் கோவில் தெருவை சேர்ந்தவர் ராஜி. இவரது மகன் விஜயகுமார் (வயது 33) கட்டிட தொழிலாளி. இவருக்கு புனிதா என்ற மனைவியும், நவினேஷ் (2) என்ற ஆண் குழந்தையும் உள்ளனர். இந்த நிலையில் விஜயகுமார் தனது மோட்டார் சைக்கிளில் நவினேசை ஏற்றிக்கொண்டு இந்திலி கிராமத்தில் உள்ள உறவினர் வீட்டுக்கு சென்றார். பின்னர் அங்கிருந்து தனது ஊருக்கு புறப்பட்டார். இந்திலி பஸ் நிறுத்தம் அருகில் சென்றபோது பின்னால் வந்த கார் எதிர்பாராதவிதமாக மோட்டார் சைக்கிள் மீது மோதியது. இந்த விபத்தில் பலத்த காயமடைந்த விஜயகுமார் சம்பவ இடத்திலேயே பரிதாபமாக இறந்தார். காயமடைந்த நவினேஷ் சிகிச்சைக்காக சேலம் அரசு மருத்துவக்கல்லூரி மருத்துவமனையில் அனுமதிக்கப்பட்டுள்ளான். அங்கு அவனுக்கு டாக்டர்கள் தீவிர சிகிச்சை அளித்து வருகின்றனர். இது குறித்த புகாரின் பேரில் சின்னசேலம் போலீசார் வழக்குப்பதிவு செய்து விசாரணை நடத்தி வருகின்றனர்.