சித்தப்பாவை கொலை செய்த வாலிபர் கைது

நிலத்தகராறு

அரியலூர் மாவட்டம் ஜெயங்கொண்டம் அருகே உள்ள இலையூர் மேலவெளி கிராமத்தை சேர்ந்தவர் சங்கர். இவருக்கும் இவருடைய அண்ணன் ராஜேந்திரனுக்கும் இடையே நிலத்தகராறு தொடர்பாக ஏற்கனவே முன்விரோதம் இருந்துள்ளது.

இந்தநிலையில் சங்கருக்கு சொந்தமான இடத்தில் உள்ள மரத்தில் ராஜேந்திரன் குடும்பத்தினர் புளியை உலுக்கியுள்ளனர். இதனால் சங்கர் மற்றும் ராஜேந்திரனுக்கு இடையே கடந்த சில நாட்களுக்கு முன்பு தகராறு ஏற்பட்டது. இதில் ஆத்திரம் அடைந்த ராஜேந்திரன், அவருடைய மனைவி கவிதா, மகன் கவுண்டர் ஆகியோர் சேர்ந்து சங்கரை சரமாரியாக தாக்கியுள்ளனர்.

கைது

இதில் பலத்த காயமடைந்த சங்கர் ஜெயங்கொண்டம் அரசு மருத்துவமனையில் முதலுதவி சிகிச்சை பெற்று மேல் சிகிச்சைக்காக அரியலூர் அரசு மருத்துவக்கல்லூரி மருத்துவமனையில் சிகிச்சை பெற்று வந்தார். இந்த நிலையில் சிகிச்சை பலனின்றி சங்கர் பரிதாபமாக இறந்தார். இந்த சம்பவம் குறித்து போலீசார் வழக்குப்பதிவு செய்து சித்தப்பாவை கொலை செய்த கவுண்டரை கைது செய்தனர். மேலும் இந்த வழக்கில் தொடர்புடைய ராஜேந்திரன், கவிதா ஆகியோர் மீது போலீசார் வழக்குப்பதிவு செய்து விசாரணை நடத்தி வருகிறார்கள்.