குடியிருப்புகள் பாதுகாப்பில் பிரதான அம்சங்கள்

நகர்ப்புறங்களில் அதிகரித்து வரும் ஜனத்தொகை அதிகரித்து வரும் சூழலில் வீடுகள் அல்லது அடுக்கு மாடி குடியிருப்புகளின் பாதுகாப்பு வி‌ஷயத்தில் வீட்டு உரிமையாளர்கள் தாங்களே கடைப்பிடிக்க வேண்டிய வி‌ஷயங்களை கட்டுமான நிபுணர்கள் குறிப்பிட்டுள்ளார்கள். அவர்களது ஆலோசனைகள் பின்வருமாறு:

* குடியிருப்புகளின் நுழைவாசல் கதவில் ‘டோர் லென்ஸ்’ பதிப்பது முக்கியம். அதன் மூலமாக வெளியில் நிற்பவரை கதவை திறக்காமலே பார்க்க இயலும்.

* ஒரு வேளை கதவை திறக்க வேண்டி வந்தாலும், முற்றிலும் திறக்க இயலாதவாறு தடுக்கக்கூடிய சிறிய அளவு கொண்ட ‘டோர் லாக்’ சங்கிலி இணைப்பும் அவசியமான ஒன்றாகும்.

* நம்பர் லாக், கைரேகை பதிவு லாக் மற்றும் நவீன பூட்டுக்கள் ஆகியவை தற்போது பெருமளவு உபயோகத்தில் உள்ளன. கூடுதலாக, ‘வாய்ஸ் மேட்ச்’, ‘ஐ வியூ மேட்ச்’ போன்ற அதிநவீன டெக்னாலஜியுடன் கூடிய பாதுகாப்பு சாதனங்களும் சந்தையில் கிடைக்கின்றன.

* வீட்டு உரிமையாளர் மட்டுமே எளிதாக அறியும்வண்ணம், லாக்கர்களுக்கான சரியான இடத்தை வீட்டு ‘பிளான்’ அமைப்பிலேயே முடிவு செய்வது நல்லது. அதன் மூலம் கூடுதல் பாதுகாப்பு கிடைக்கும்.

* தரைத்தள மட்டத்தில் உள்ள லாக்கர்கள் பாதுகாப்பானது என்றாலும், அதற்குள் வைக்கப்பட்ட முக்கியமான பொருட்கள் அல்லது ஆவணங்கள் சுற்றுப்புற தட்பவெப்ப நிலைகளால் பாதிக்கப்படும் வாய்ப்பு இருப்பதை மனதில் கொள்ளவேண்டும்.

* சுவர்களில் உள்ள லாக்கர் அமைப்புகளை கச்சிதமாக மறைக்கக்கூடிய வகையில் படங்கள் அல்லது அலமாரி வகைகள் தற்போது சந்தையில் கிடைக்கின்றன. அவை நல்ல தேர்வாகவும் இருக்கும்.