ஷமி அபார பந்துவீச்சு...! 'சீட்டு கட்டு போல்' சரியும் டெல்லி விக்கெட்டுகள்...!

அகமதாபாத்,

நடப்பு ஐபிஎல் தொடரில் இன்றைய 44-வது லீக் ஆட்டத்தில் குஜராத் டைட்டன்ஸ் - டெல்லி கேப்பிடல்ஸ் மோதுகின்றன. இப்போட்டியில் டாஸ் வென்ற டெல்லி முதலில் பேட்டிங்கை தேர்வு செய்தது.

இதையடுத்து, டெல்லி அணியின் தொடக்க வீரர்களாக பிலிப் சால்ட், கேப்டன் டேவிட் வார்னர் களமிறங்கினர்.

ஆட்டத்தின் முதல் பந்திலேயே பிலிப் சால்ட் ரன் எதுவும் எடுக்காமல் (0) கேட்ச் கொடுத்து அவுட் ஆனார். அடுத்த ஓவரிலேயே கேப்டன் வார்னர் 2 ரன்னில் ரன் அவுட் ஆனார். அடுத்து வந்த ரூசோவ் 8 ரன்னிலும், மனீஷ் பாண்டே 1 ரன்னிலும், பிரியம் கர்க் 10 ரன்னிலும் அடுத்தடுத்து ஆட்டமிழந்து ஏமாற்றம் அளித்தனர்.

தற்போதைய நிலவரப்படி டெல்லி கேப்பிடல்ஸ் 7 ஓவர்கள் முடிவில் 5 விக்கெட்டுகளை இழந்து 32 ரன்கள் மட்டுமே எடுத்துள்ளது. அக்சர் பட்டேல் 6 ரன்னிலும், அமென் கஹிம் கான் 4 ரன்னிலும் களத்தில் உள்ளனர்.

சிறப்பாக பந்து வீசிய முகமது ஷமி 4 ஓவரில் 11 ரன்களை மட்டும் விட்டுக்கொடுத்து 4 விக்கெட்டுகளையும் வீழ்த்தினார்.