ஐ.பி.எல். கிரிக்கெட்: பெங்களூரு அணியில் மைக்கேல் பிரேஸ்வெல் சேர்ப்பு

16-வது ஐ.பி.எல். 20 ஓவர் கிரிக்கெட் போட்டி வருகிற 31-ந் தேதி தொடங்குகிறது. இந்த போட்டிக்கான பெங்களூரு ராயல் சேலஞ்சர்ஸ் அணியில் இடம் பிடித்து இருந்த இங்கிலாந்து பேட்ஸ்மேன் வில் ஜாக் சமீபத்தில் நடந்த வங்காளதேசத்துக்கு எதிரான 2-வது நாள் போட்டியின் போது பீல்டிங் செய்கையில் காயம் அடைந்ததால் ஐ.பி.எல். போட்டியில் இருந்து விலகினார். அவருக்கு பதிலாக நியூசிலாந்து ஆல்-ரவுண்டர் மைக்கேல் பிரேஸ்வெல் சேர்க்கப்பட்டுள்ளார். அவரை அடிப்படை விலையான ரூ.1 கோடிக்கு பெங்களூரு அணி நிர்வாகம் ஒப்பந்தம் செய்துள்ளது. மைக்கேல் பிரேஸ்வெல் நியூசிலாந்து அணிக்காக 7 டெஸ்ட், 19 ஒருநாள் மற்றும் 16 இருபது ஓவர் போட்டிகளில் விளையாடி இருக்கிறார். வில் ஜாக்கை பெங்களூரு அணி ரூ.3.2 கோடிக்கு ஏலத்தில் எடுத்து இருந்தது குறிப்பிடத்தக்கது.