நிதிஷ் ராணா, ரிங்கு சிங் அதிரடி வீண்; கொல்கத்தாவை வீழ்த்தி ஐதராபாத் அபார வெற்றி

கொல்கத்தா,

16வது ஐபிஎல் தொடரின் இன்றைய லீக் ஆட்டத்தில் கொல்கத்தா நைட் ரைடர்ஸ் மற்றும் சன் ரைசர்ஸ் ஐதராபாத் அணிகள் மோதின.

இந்த ஆட்டத்துக்கான டாஸ் வென்ற கொல்கத்தா கேப்டன் நிதிஷ் ராணா முதலில் பந்து வீச்சை தேர்வு செய்தார். இதையடுத்து ஐதராபாத் தொடக்க வீரர்களாக ஹாரி ப்ரூக் மற்றும் மயங்க அகர்வால் களம் இறங்கினர்.

இதில் ஹாரி ப்ரூக் ஒரு புறம் அதிரடியில் மிரட்ட மறுபுறம் அகர்வால் 9 ரன்னும், அடுத்த வந்த திரிபாதி 9 ரன்னும் எடுத்த நிலையில் அடுத்தடுத்து அவுட் ஆகி ஏமாற்றம் அளித்தனர். இதையடுத்து ஹாரி ப்ரூக்குடன் கேப்டன் எய்டன் மார்க்ரம் ஜோடி சேர்ந்தார். இந்த இணை அதிரடியில் மிரட்டி வேகமாக ரன்களை குவித்தது.

அதிரடியில் மிரட்டிய இந்த இணையால் அணியின் ஸ்கோர் மளமளவென உயர்ந்தது. ப்ரூக், மார்க்ரம் இருவரும் அரைசதம் அடித்து அசத்தினர். இதில் கேப்டன் மார்க்ரம் 26 பந்தில் அரைசதம் அடித்த நிலையில் கேட்ச் மூலம் அவுட் ஆனார். இதையடுத்து ப்ரூக்குடன் அபிஷேக் சர்மா ஜோடி சேர்ந்தார்.

இந்த இணையும் அதிரடியில் மிரட்டி கொல்கத்தாவின் பந்துவீச்சை நாலாபுறம் விரட்டியது. ஐதராபாத் அணி 18 ஓவர்களில் 200 ரன்களை எட்டியது. அதிரடி ஆட்டத்தை வெளிப்படுத்திய அபிஷேக் சர்மா 17 பந்தில் 32 ரன்கள் எடுத்த நிலையில் அவுட் ஆனார். இதையடுத்து கிளாசென் களம் இறங்கினார்.

ஒரு முனையில் அதிரடி ஆட்டத்தை வெளிப்படுத்தி வந்த ப்ரூக் 55 பந்தில் சதம் அடித்து அசத்தினார். நடப்பு ஐபிஎல் தொடரில் அடிக்கப்பட்ட முதல் சதம் இதுவாகும். இறுதியில் அந்த அணி 20 ஓவர்கள் முடிவில் 4 விக்கெட்டுகளை இழந்து 228 ரன்கள் குவித்தது.

இதையடுத்து 229 ரன்கள் எடுத்தால் வெற்றி என்ற கடினமான இலக்குடன் கொல்கத்தா நைட் ரைடர்ஸ் தொடக்க வீரர்கள் குர்பாஸ், ஜெகதீசன் களமிறங்கினர். 3 பந்துகளை சந்தித்த குர்பாஸ் ரன் எதுவும் எடுக்காமல் (0) ஆட்டமிழந்தார்.

அடுத்துவந்த வெங்கடேஷ் 10 ரன்னிலும், அடுத்து வந்த சுனில் நரைன் ரன் எதுவும் எடுக்காமலும் (0) அடுத்தடுத்து அவுட் ஆகி ஏமாற்றம் அளித்தனர்.

அடுத்து வந்த கேப்டன் நிதிஷ் ராணா, ஜெகதீசனுடன் ஜோடி சேர்ந்து அதிரடி ஆட்டத்தை வெளிப்படுத்தினார். ஜெகதீசன் 21 பந்துகளில் 36 ரன்கள் குவித்து ஆட்டமிழந்தார். அடுத்துவந்த ரசல் 3 ரன்னில் வெளியேறினார்.

தொடர்ந்து களமிறங்கிய ரிங்கு சிங் கேப்டன் ரானாவுடன் ஜோடி சேர்ந்து அதிரடியாக ஆடினார். கேப்டன் நிதிஷ் ராணா 41 பந்தில் 75 ரன் எடுத்த நிலையில் அவுட் ஆனார். அடுத்து வந்த ஷர்துல் தாகூர் 12 ரன்னில் அவுட் ஆனார்.

இறுதியில் கொல்கத்தா 20 ஓவர் முடிவில் 7 விக்கெட் இழப்பிற்கு 205 ரன்கள் மட்டுமே எடுத்தது. இதன் மூலம் கொல்கத்தாவை 23 ரன்கள் வித்தியாசத்தில் வீழ்த்தி ஐதராபாத் அபார வெற்றிபெற்றது. கடைசி வரை போராடிய ரிங்கு சிங் 31 பந்தில் 58 ரன்கள் குவித்து ஆட்டமிழக்காமல் களத்தில் இருந்தார்.