பெண்கள் ஆக்கி: ஜெர்மனி அணியிடம் இந்தியா மீண்டும் தோல்வி

ரசல்ஷீம்,

ஆசிய விளையாட்டு போட்டிக்கு தயாராகும் பொருட்டு இந்திய பெண்கள் ஆக்கி அணி, ஐரோப்பாவில் சுற்றுப்பயணம் செய்து விளையாடி வருகிறது. இதில் ஜெர்மனியில் உள்ள ரசல்ஷீம் நகரில் நேற்று முன்தினம் இரவு நடந்த 3-வது மற்றும் கடைசி ஆட்டத்தில் இந்தியா-ஜெர்மனி அணிகள் மீண்டும் மோதின.

விறுவிறுப்பான இந்த ஆட்டத்தில் ஜெர்மனி வீராங்கனைகள் நிக் லோரென்ஸ் பெனால்டி கார்னர் வாய்ப்பை பயன்படுத்தி 52-வது நிமிடத்திலும், சார்லோட் ஸ்டாபென்ஹோர்ட்ஸ் 54-வது நிமிடத்திலும் கோல் அடித்தனர். கடைசி வரை போராடியும் இந்திய அணியால் பதில் கோல் எதுவும் திருப்ப முடியவில்லை.

முடிவில் ஜெர்மனி அணி 2-0 என்ற கோல் கணக்கில் இந்தியாவை வீழ்த்தியது. இந்திய அணி 2-வது ஆட்டத்தில் 1-4 என்ற கோல் கணக்கில் ஜெர்மனியிடமும், முதலாவது ஆட்டத்தில் 2-3 என்ற கோல் கணக்கில் சீனாவிடம் தோற்று இருந்தது.

ஜெர்மனி பயணத்தில் சோபிக்காத இந்திய அணி அடுத்து ஸ்பெயின் சென்று அங்கு நடைபெறும் 4 நாடுகள் ஆக்கி போட்டியில் ஆடுகிறது.