புரோ கபடி: பெங்கால் வாரியர்ஸ் 5-வது வெற்றி

சென்னை, 

புரோ கபடி லீக் போட்டி தொடரில் நேற்று நடந்த ஆட்டத்தில் பெங்கால் வாரியர்ஸ் அணி 35-26 என்ற புள்ளி கணக்கில் பாட்னா பைரட்சை வீழ்த்தி 5-வது வெற்றியை ருசித்தது.

புரோ கபடி

12 அணிகள் பங்கேற்றுள்ள 7-வது புரோ கபடி லீக் தொடர் சென்னை நேரு உள்விளையாட்டு அரங்கில் நடந்து வருகிறது. இதில் நேற்றிரவு நடந்த 53-வது லீக் ஆட்டத்தில் பெங்கால் வாரியர்ஸ், 3 முறை சாம்பியனான பாட்னா பைரட்ஸ் அணியை சந்தித்தது.

தொடக்கத்தில் இருந்து இரு அணிகளும் மாறி, மாறி புள்ளிகள் எடுத்ததால் ஆட்டம் விறுவிறுப்பாக நகர்ந்தது. முதல் பாதியில் பெங்கால் வாரியர்ஸ் அணி 15-14 என்ற புள்ளி கணக்கில் முன்னிலை வகித்தது.

பெங்கால் வாரியர்ஸ் வெற்றி

பிற்பாதியில் பெங்கால் வாரியர்ஸ் அணியின் கை ஓங்கியது. அந்த அணி அடுத்தடுத்து 2 முறை பாட்னா பைரட்சை ‘ஆல்-அவுட்’ செய்து அதிர்ச்சி அளித்ததுடன் 18 புள்ளிகள் வரை முன்னிலை வித்தியாசத்தை அதிகரித்தது. கடைசி கட்டத்தில் சரிவில் இருந்து மீண்டு வந்த பாட்னா பைரட்ஸ் அணி, பெங்கால் வாரியர்ஸ் அணியை ‘ஆல்-அவுட்’ செய்து ஆறுதல் கண்டாலும், வெற்றியை நெருங்க முடியவில்லை. முடிவில் பெங்கால் வாரியர்ஸ் 35-26 என்ற புள்ளி கணக்கில் பாட்னா பைரட்சை வீழ்த்தியது. பெங்கால் வாரியர்ஸ் அணியில் மனிந்தர்சிங் 10 புள்ளியும், பிரபஞ்சன் 6 புள்ளியும் சேர்த்தனர்.

9-வது ஆட்டத்தில் ஆடிய பெங்கால் வாரியர்ஸ் பெற்ற 5-வது வெற்றி இதுவாகும். 2 தோல்வியும், 2 டையும் கண்டுள்ள அந்த அணி 2-வது இடத்தில் உள்ளது. 9-வது ஆட்டத்தில் ஆடிய பாட்னா பைரட்ஸ் சந்தித்த 6-வது தோல்வி இதுவாகும். 3 ஆட்டத்தில் வெற்றி கண்டு இருக்கும் பாட்னா பைரட்ஸ் புள்ளி பட்டியலில் கடைசி இடத்தில் உள்ளது.

இன்றைய ஆட்டங்கள்

சென்னை சுற்று போட்டி இன்றுடன் (வெள்ளிக்கிழமை) முடிவுக்கு வருகிறது. இதே மைதானத்தில் இன்று நடைபெறும் ஆட்டங்களில் குஜராத் பார்ச்சுன் ஜெயன்ட்ஸ் -பாட்னா பைரட்ஸ் (இரவு 7.30 மணி), தமிழ் தலைவாஸ் -மும்பை (இரவு 8.30 மணி) அணிகள் மோதுகின்றன. 9 ஆட்டத்தில் ஆடி 3 வெற்றி, 4 தோல்வி, 2 டையுடன் 6-வது இடத்தில் இருக்கும் தமிழ் தலைவாஸ் அணி உள்ளூரில் இந்த சீசனில் ஒரு ஆட்டத்தில் கூட வெற்றி பெறவில்லை. இங்கு 2 ஆட்டத்தில் தோல்வி (பெங்களூரு புல்ஸ், ஜெய்ப்பூர் பிங்க் பாந்தர்ஸ் அணிக்கு எதிராக) கண்டது. புனேரி பால்டன் அணிக்கு எதிரான ஆட்டத்தில் ‘டை’ செய்தது. இன்றைய ஆட்டத்திலாவது தமிழ் தலைவாஸ் அணி வெற்றி பெற்று உள்ளூர் ரசிகர்களுக்கு உற்சாகத்தை அளிக்குமா? என்று எதிர்பார்க்கப்படுகிறது.