அமெரிக்க ஓபன் டென்னிஸ்: ஆண்கள் இரட்டையர் பிரிவில் போபண்ணா இணை அரையிறுதிக்கு முன்னேற்றம்...!

நியூயார்க்,

அமெரிக்க ஓபன் டென்னிஸ் தொடர் நியூயார்க் நகரில் நடைபெற்று வருகிறது. இதில் இன்று நடைபெற்ற ஆண்கள் இரட்டையர் பிரிவின் காலிறுதி ஆட்டம் ஒன்றில் இந்தியாவின் போபண்ணா - ஆஸ்திரேலியாவின் மேத்யூ எம்டன் இணை அமெரிக்காவின் நதானியேல் லாம்மன்ஸ் - ஜாக்சன் வித்ரோ இணையை எதிர்கொண்டது.

இந்த ஆட்டத்தில் முதல் செட்டை 7-6 என போராடி கைப்பற்றிய போபண்ணா இணை அடுத்த செட்டை 6-1 என எளிதாக கைப்பற்றி அசத்தியது. இறுதியில் 7-6, 6-1 என்ற செட் கணக்கில் போபண்ணா இணை நதானியேல் லாம்மன்ஸ் - ஜாக்சன் வித்ரோ இணையை வீழ்த்தி அரையிறுதிக்கு முன்னேறியது.

போபண்ணா இணை அரையிறுதி ஆட்டத்தில் பிரான்சின் நிக்கோலஸ் மஹத் - பியர்-ஹியூஸ் ஹெர்பர்ட் இணையை எதிர்கொள்ள உள்ளது.