இந்த கோவிலில் சிறப்பு வழிபாடு செய்தால் அமெரிக்க விசா கிடைக்கும் - பக்தர்கள் நம்பிக்கை

ஐதராபாத்,

அமெரிக்காவில் பணிபுரிய வெளிநாட்டினருக்கு எச்-1பி விசா வழங்கப்பட்டு வருகிறது. இதற்கிடையே எச்-1பி விசா கட்டணத்தை 1 லட்சம் அமெரிக்க டாலர்களாக (இந்திய மதிப்பில் ரூ.88 லட்சம்) அதிபர் டிரம்ப் உயர்த்தினார். ரூ.1.75 லட்சமாக இருந்த இந்த கட்டணம் பல மடங்கு உயர்த்தப்பட்டது. இந்த கட்டணத்தை எச்-1பி விசா பெற்று பணியாற்றும் ஒரு பணியாளருக்கும் அவரைப் பணியமர்த்தும் நிறுவனங்கள் செலுத்த வேண்டும் என்று தெரிவிக்கப்பட்டது.அமெரிக்காவின் வேலை வாய்ப்புகளில் அமெரிக்கர்களுக்கே முன்னுரிமை அளிக்கும் நோக்கில் இந்த நட வடிக்கை எடுக்கப்பட்டதாக அந்நாட்டு அரசு தெரிவித்தது. இது எச்-1பி விசாவை அதிகளவில் பெறும் இந்தியர்களுக்கு அதிர்ச்சி அளிப்பதாக அமைந்து உள்ளது.

ஆனால் தெலுங்கானா மாநிலம் சில்கூரில் உள்ள பாலாஜி கோவிலில், சிறப்பு வழிபாடு செய்தால் வெளிநாடு விசா கிடைக்கும் என்று பக்தர்களால் நம்பப்படுகிறது. ‘விசா பாலாஜி கோவில்’ என்று அழைக்கப்படும் இந்த கோவில் மாணவர்கள் மற்றும் தொழில் வல்லுநர்கள் மத்தியில், குறிப்பாக அமெரிக்காவில் பணிபுரிய விரும்பும் ஐடி துறையில் உள்ளவர்களிடையே பிரபலமாக உள்ளது. இந்த கோவிலில் வழிபடுவது விசா பெறுவதற்கான வாய்ப்புகளை அதிகரிக்கிறது என்ற நம்பிக்கை மிகவும் பரவலாகிவிட்டதால், H-1B விண்ணப்பதாரர்களிடையே இந்த கோவில் கிட்டத்தட்ட 20 ஆண்டுகளாக மிகவும் பிரபலமாக உள்ளது.

இந்த கோவில் ஒரு தனித்துவமான சடங்கிற்காக அறியப்படுகிறது, அங்கு பக்தர்கள் தங்கள் விருப்பங்கள் நிறைவேறும் என்ற நம்பிக்கையில் கருவறையைச் சுற்றி 11 அல்லது 108 முறை வலம் வருவது அல்லது 'அங்கபிரதட்சணம்' செய்கிறார்கள்.

இந்த தனித்துவமான கோவில் விசா பிரார்த்தனைகளுடன் தொடர்புடையதாக மட்டுமல்லாமல், பண நன்கொடைகளை மறுக்கும் அதன் நீண்டகால கொள்கைக்காகவும் தனித்து நிற்கிறது. கோவிலில் 'உண்டியல்' மற்றும் நன்கொடை பெட்டிகள் இல்லை, பக்தர்களிடமிருந்து பணம் ஏற்றுக்கொள்ளப்படுவதில்லை. கூடுதலாக, விஐபி பார்வையாளர்களுக்கு எந்த சிறப்பு வசதியும் வழங்கப்படுவதில்லை, இந்த நடைமுறை கோவிலின் எளிமை மற்றும் சமத்துவத்திற்கான நற்பெயரைத் தக்க வைத்துக் கொள்ள உதவி உள்ளது.

அமெரிக்கா குடியேற்ற விதிகளை கடுமையாக்கி, அதிக கட்டணங்களை விதித்து வருவதால், சில்கூர் பாலாஜி கோவில் பலருக்கு, குறிப்பாக ஐடி துறையில் உள்ளவர்களுக்கு நம்பிக்கையின் ஆதாரமாக மாறி உள்ளது.

இதுபற்றி தனியார் நிறுவனத்தின் தொழில்நுட்ப ஆய்வாளர் வினய் கூறுகையில், எச்-1பி விசா பெறுவதற்கு லாட்டரி டிக்கெட்டில் பரிசு விழவேண்டும். அந்த அளவுக்கு எச்-1பி விசா கட்டணம் அதிகரித்துள்ளது. அந்த அதிர்ஷ்டம் கிடைக்கிறதோ இல்லையோ தெரியவில்லை. விசா பாலாஜியை வேண்டினால் கிடைத்துவிடும் என்ற நம்பிக்கையில் வந்துள்ளேன் என்றார்.