வீட்டிலேயே மனைவிக்கு பிரசவம்.. வங்கி மேலாளர் செய்த செயலால் சுகாதாரத்துறையினர் அதிர்ச்சி

தூத்துக்குடி மாவட்டம் திருச்செந்தூரைச் சேர்ந்தவர் கஜேந்திரன் (வயது 32). இவர் தேசிய மயமாக்கப்பட்ட வங்கியில் மேலாளராக பணிபுரிந்து வருகிறார். அவரது மனைவி சத்யா (26). இவர்கள் திண்டுக்கல் மாவட்டம், கோபால்பட்டி எல்லைநகரில் உள்ள ஒரு வாடகை வீட்டில் வசித்து வருகின்றனர். சத்யா நிறைமாத கர்ப்பிணியாக இருந்தார். இந்த நிலையில் நேற்று மதியம் சத்யாவிற்கு பிரசவ வலி ஏற்பட்டது.

இதனால் வலியால் துடித்துள்ளார். இது குறித்து அப்பகுதி பொதுமக்கள் கொடுத்த தகவலின்பேரில் கொசவப்பட்டி வட்டார மருத்துவ அலுவலர் ரெங்கசாமி, கோபால்பட்டி அரசு மருத்துவ அலுவலர் பிவின்ஆரோன், டாக்டர் சந்தானக்குமார், செவிலியர்கள், சாணார்பட்டி சப்-இன்ஸ்பெக்டர் பொன்.குணசேகரன், வேம்பார்பட்டி கிராம நிர்வாக அலுவலர் சுப்புராஜ் மற்றும் பொதுமக்கள் வீட்டின் முன்பு குவிந்தனர். பின்னர் கஜேந்திரன், சத்யா தம்பதியினரிடம் பிரசவத்திற்காக மருத்துவமனையில் சேருமாறு வற்புறுத்தி உள்ளனர்.

ஆனால் தம்பதி இருவரும் வீட்டின் கதவு, ஜன்னல்களை மூடிக்கொண்டு யாரையும் உள்ளே அனுமதிக்கவில்லையாம். இதையடுத்து மாலை 6.30 மணி அளவில் குழந்தையின் அழுகுரல் மட்டும் கேட்டுள்ளது. இதனால் அதிர்ச்சி அடைந்த சுகாதாரத்துறையினர் கதவை திறக்க சொல்லியும் அவர்கள் கேட்கவில்லையாம். ஒரு வழியாக 7 மணிக்கு அவர்கள் கதவை திறந்துள்ளனர். அப்போது சத்யாவிற்கு அழகான பெண் குழந்தை சுக பிரசவத்தில் பிறந்தது தெரியவந்தது. இதையடுத்து தாயையும், குழந்தையும் டாக்டர்கள் பரிசோதித்து நலமாக இருப்பதாக தெரிவித்தனர்.

பின்னர் கஜேந்திரனிடம் சுகாதாரத்துறையினர் விசாரணை நடத்தினர். விசாரணையில், அவர் வீடியோ கால் மூலம் ஒருவரிடம் பேசி மனைவிக்கு பிரவசம் பார்த்தது தெரியவந்தது. இதுகுறித்து அவரிடம் சுகாதாரத்துறையினர் தீவிர விசாரணை நடத்தி வருகின்றனர்.

மேலும், இந்த சம்பவம் குறித்து நடவடிக்கை எடுக்க கலெக்டருக்கு சுகாதாரத்துறையினர் பரிந்துரை செய்துள்ளனர். மேலும், குழந்தையின் பாதுகாப்பிற்காக வீட்டின் அருகே முன்னெச்சரிக்கையாக ஒரு ஆம்புலன்சையும் நிறுத்தி வைத்துள்ளனர். இந்த சம்பவம் அப்பகுதியில் பெரும் பரபரப்பை ஏற்படுத்தி உள்ளது.