மிதுனம் - தமிழ் மாத ஜோதிடம்

ஆவணி மாத ராசி பலன்கள் 17-08-2022 முதல் 17-09-2022 வரை

நினைத்ததை நினைத்தபடி செய்து முடிக்க வேண்டும்என்று சொல்லும் மிதுன ராசி நேயர்களே!

ஆவணி மாதக் கிரக நிலைகளை ஆராய்ந்து பார்க்கும் பொழுது, மாதத் தொடக்கத்தில் உங்கள் ராசிநாதன் புதன் சகாய ஸ்தானத்தில் சூரியனோடு இணைந்து சஞ்சரிக்கிறார். அஷ்டமத்துச் சனி வக்ரத்தில் இருப்பதால் பொருளாதாரம் திருப்தி தரும்.

சிம்ம - சூரியன் சஞ்சாரம்

உங்கள் ராசிக்கு 3-ம் இடத்திற்கு அதிபதி சூரியன். இவர் மாதம் முழுவதும் அங்கேயே சஞ்சரிக்கிறார். எனவே தொட்ட காரியங்களில் வெற்றி கிடைக்கும். தொல்லை தந்தவர்கள் விலகுவர். தொழில், உத்தியோகம் சம்பந்தமாக எடுத்த முயற்சியில் அனுகூலம் கிடைக்கும். புதிய பொறுப்புகள் கிடைக்கும். உத்தியோகத்தில் வேலைப்பளு குறையும். தொழிலில் பணியாளர்கள் இணைந்து செயல்படுவர்.

கன்னி - புதன் சஞ்சாரம்

ஆவணி 8-ந் தேதி, கன்னி ராசிக்குச் செல்லும் புதன், அங்கு உச்சம் பெறுகிறார். உங்கள் ராசி அதிபதி உச்சம் பெறுவது யோகம்தான். ஆரோக்கியம் சீராகும். வாகன மாற்றம் செய்ய உகந்த நேரம் இது. கரைந்த சேமிப்புகளை ஈடுகட்டுவீர்கள். உத்தியோகத்தில் கேட்ட சலுகைகள் கிடைக்கும்.

வக்ர புதன் சஞ்சாரம்

ஆவணி 12-ந் தேதி, சிம்ம ராசிக்கு புதன் வக்ர இயக்கத்தில் செல்கிறார். உங்கள் ராசிக்கும், 4-ம் இடத்திற்கும் அதிபதியானவர் புதன். கேந்திராதிபத்ய தோஷம் பெற்ற கிரகம் வக்ரம்பெறுவது யோகம்தான். இக்காலத்தில் இடமாற்றம், வீடு மாற்றம் திருப்தி அளிக்கும். புதிய முயற்சிகளில் வெற்றி உண்டு. இந்த காலகட்டத்தில் கூடுதல் விழிப்புணர்ச்சி தேவை. ஆரோக்கியத்தில் கவனம் செலுத்துவது நல்லது.

சிம்ம - சுக்ரன் சஞ்சாரம்

ஆவணி 16-ந் தேதி, சிம்ம ராசிக்கு சுக்ரன் செல்கிறார். உங்கள் ராசிக்கு 5, 12 ஆகிய இடங்களுக்கு அதிபதியானவர் சுக்ரன். அவர் சகாய ஸ்தானத்திற்கு வரும்போது, பிள்ளைகள் வழியில் சுபவிரயம் ஏற்படும். பூர்வீக சொத்துக்களை பிரித்துக்கொள்வதில் இருந்த தடைகள் மாறும். வீட்டிற்குத் தேவையான அத்தியாவசியப் பொருட்களை வாங்க முன்வருவீர்கள்.

குரு வக்ரமும், சனி வக்ரமும்

மாதம் முழுவதும் குருவும், சனியும் வக்ர இயக்கத்தில் இருக்கிறார்கள். உங்கள் ராசிக்கு 7, 10 ஆகிய இடங்களுக்கு அதிபதியான குரு வக்ரம் பெறும்போது, நற்பலன்கள் கிடைக்கும். கேந்திராதிபத்ய தோஷம் பெற்ற கிரகம் என்பதால், எண்ணங்கள் நிறைவேறும். உங்கள் ராசிக்கு 8, 9 ஆகிய இடங்களுக்கு அதிபதியான சனி வக்ரம் பெறுகையில், ஒரு சில நன்மைகளைச் செய்தாலும், உறவினர் வழியில் பிரச்சினைகளை உருவாக்கும். ஆரோக்கியம் சீராக இருந்தாலும் நிம்மதி குறைவாக இருக்கும்.

இந்த மாதம் வியாழக்கிழமை தோறும் குருபகவானை வழிபட்டால் நன்மைகள் அதிகம் பெறலாம்.

பணத்தேவையைப் பூர்த்தி செய்யும் நாட்கள்:- ஆகஸ்டு: 25, 26, 30, 31, செப்டம்பர்: 10, 11, 14, 15 மகிழ்ச்சி தரும் வண்ணம்:- பச்சை.

பெண்களுக்கான பலன்கள்

இம்மாதம் அஷ்டமத்து சனி வக்ரம் பெற்றிருப்பதால் ஆரோக்கியம் சீராகும். ஆதாயம் தரும் தகவல்கள் நிறைய கிடைக்கும். கணவன் - மனைவிக்குள் பிணக்கு ஏற்படாமல் இருக்க விட்டுக் கொடுத்துச் செல்லுங்கள். சொத்துக்கள் வாங்கும் யோகம் உண்டு. பிள்ளைகள் வழியில் சுபகாரியங்கள் எதிர்பார்த்தபடி நடைபெறும். பணிபுரியும் பெண்களுக்கு கேட்ட சலுகைகள் கிடைக்கும். அரசுப் பணிக்கு முயற்சித்தவர்களுக்கு அது கைகூடும்.