விருச்சகம் - தமிழ் மாத ஜோதிடம்


விருச்சகம் - தமிழ் மாத ஜோதிடம்
தினத்தந்தி 14 Jun 2022 12:53 PM GMT (Updated: 2022-06-14T18:25:20+05:30)

ஆனி மாத ராசி பலன்கள் 15-06-2022 முதல் 16-07-2022 வரை


புகழ்பெற்ற மனிதராக வாழ வேண்டும் என்று விரும்பும் விருச்சிக ராசி நேயர்களே!

ஆனி மாதக் கிரக நிலைகளை ஆராய்ந்து பார்க்கும் பொழுது, மாதத் தொடக்கத்தில் உங்கள் ராசிநாதன் செவ்வாய், குருவோடு இணைந்து 'குருமங்கள யோக'த்தை உருவாக்குகிறார். மேலும் குருவின் பரிபூரண பார்வை விருச்சிக ராசியில் பதிகிறது. எனவே தொட்ட காரியங்களில் வெற்றி கிடைக்கும்.

ரிஷப - சுக்ரன் சஞ்சாரம்

ஆனி 4-ந் தேதி, ரிஷப ராசிக்கு சுக்ரன் செல்கிறார். உங்கள் ராசிக்கு 7, 12 ஆகிய இடங்களுக்கு அதிபதியானவர் சுக்ரன். அவர் சப்தம ஸ்தானத்தில் தன் சொந்த வீட்டில் இருந்துகொண்டு உங்கள் ராசியைப் பார்ப்பது யோகம்தான். சுபகாரியங்கள் நடைபெறும். அக்கறை செலுத்தாத காரியத்தில் கூட ஆதாயம் கிடைக்கும். பொருளாதார முன்னேற்றம் உண்டு.

மிதுன - புதன் சஞ்சாரம்

ஆனி 11-ந் தேதி, மிதுன ராசிக்கு புதன் செல்கிறார். உங்கள் ராசிக்கு அஷ்டம, லாபாதிபதியான புதன், அஷ்டமத்தில் சூரியனோடு இணைந்து 'புத ஆதித்ய யோக'த்தை உருவாக்குவதால் கலை, கல்வி சம்பந்தமாக எடுத்த முயற்சி கைகூடும். பொதுவாழ்வில் புதிய பொறுப்பு கிடைக்கும். மறைந்த புதனால் நிறைந்த தனலாபம் உண்டு என்பதற்கேற்ப, தொழிலில் கூடுதல் லாபம் வரும். உத்தியோகத்தில் ஊதிய உயர்வு கிடைக்கும்.

மேஷ - செவ்வாய் சஞ்சாரம்

ஆனி 12-ந் தேதி, மேஷ ராசிக்கு செவ்வாய் செல்கிறார். மேஷம் செவ்வாய்க்கு சொந்த வீடாகும். உங்கள் ராசிநாதனாக விளங்கும் செவ்வாய், தன் சொந்த வீட்டில் சஞ்சரிக்கும் பொழுது உடல்நலம் சீராகும். 'விபரீத ராஜயோக' அடிப்படையில் செவ்வாய் சஞ்சரிப்பதால், எதிர்பாராத நல்ல திருப்பங்கள் ஏற்படும். புதிய முயற்சிகள் அனைத்திலும் வெற்றி கிடைக்கும்.

கடக - புதன் சஞ்சாரம்

ஆனி மாதம் 28-ந் தேதி, கடக ராசிக்கு புதன் வருகிறார். உங்கள் ராசிக்கு லாபாதிபதியாக விளங்கும் புதன் பாக்கிய ஸ்தானத்தில் சஞ்சரிக்கும் பொழுது, புதிய முயற்சிகளில் வெற்றி கிடைக்கும். புகழ்மிக்கவர்கள் உங்களுக்குப் பின்னணியாக இருந்து சில காரியங்களை முடித்துக் கொடுப்பர். பெற்றோர் வழிப் பிரச்சினை சமரசத்திற்கு வரும். மேலதிகாரிகள் கேட்ட சலுகைகளை கொடுக்க முன்வருவர். பணப்பொறுப்பு சொல்லி வாங்கிக் கொடுத்த தொகை வந்து சேரும்.

மிதுன - சுக்ரன் சஞ்சாரம்

ஆனி 29-ந் தேதி, மிதுன ராசிக்கு சுக்ரன் செல்கிறார். அங்குள்ள தொழில் ஸ்தானாதிபதி சூரியனோடு இணைவதால் தொழில் வளம் சிறப்பாக இருக்கும். செல்வநிலை உயரும். புதிய தொழில் தொடங்கும் முயற்சியில் ஆர்வம் காட்டுவீர்கள். உத்தியோகத்தில் இருப்பவர்கள், சுய தொழில் தொடங்குவது பற்றி சிந்திப்பார்கள். பழைய நகைகளைக் கொடுத்துவிட்டுப் புதிய நகைகள் வாங்குவதில் ஆர்வம் காட்டுவீர்கள். எதிர்காலத்திற்கு உத்தரவாதம் கொடுக்கும் விதத்தில் பல நல்ல சம்பவங்கள் நடைபெறும்.

இம்மாதம் வராஹி அம்மன் வழிபாடு வளர்ச்சியைக் கூட்டும்.

பணத்தேவையைப் பூர்த்தி செய்யும் நாட்கள்:- ஜூன்: 15, 16, 17, 20, 21, ஜூலை: 1, 2, 7, 8, 12, 13, 14 மகிழ்ச்சி தரும் வண்ணம்:- வைலட்.

பெண்களுக்கான பலன்கள்

இம்மாதம் வசதி வாய்ப்புகள் அதிகரிக்கும். பொருளாதாரத்தில் நிறைவு ஏற்படும். கணவன் - மனைவிக்குள் அன்பும், அரவணைப்பும் அதிகரிக்கும். சொத்துக்கள் வாங்கும் யோகம் உண்டு. பிள்ளைகளின் எதிர்கால நலன் கருதி நீங்கள் எடுத்த முயற்சிகளில் வெற்றி கிடைக்கும். உத்தியோகத்தில் இருப்பவர்களுக்கு பணிச்சுமை அதிகரித்தாலும் அதற்கு ஏற்ற விதத்தில் சம்பளமும் கிடைக்கும். ஆன்மிகப் பயணங்களால் மகிழ்ச்சி ஏற்படும்.


Next Story