ரிஷபம் - ஆடி தமிழ் மாத ஜோதிடம்

ஆடி மாத ராசி பலன்கள் 17-07-2023 முதல் 17-08-2023 வரை

தனக்கென தனிப்பாணியை அமைத்துக் கொள்ளும் ரிஷப ராசி நேயர்களே!

ஆடி மாதக் கிரக நிலைகளை ஆராய்ந்து பார்க்கும் பொழுது, மாதத் தொடக்கத்தில் உங்கள் ராசிநாதன் சுக்ரன், ராசிக்கு 4-ம் இடமான சுக ஸ்தானத்தில் விரயாதிபதி செவ்வாயோடு இணைந்து சஞ்சரிக்கிறார். மேலும் தொழில் ஸ்தானத்தில் வக்ரமாக சஞ்சரிக்கும் சனியையும் பார்க்கிறார். எனவே தடைகளும், தாமதங்களும் அதிகரிக்கலாம். ஆரோக்கியத் தொல்லைகளும், அடிக்கடி வந்து அலைமோதும். அவ்வப்போது நீங்கள் மேற்கொள்ளும் ஆலய வழிபாடு நன்மைக்கு வழிவகுக்கும். குருவின் பார்வை உங்கள் ராசிநாதன் மீது பதிவதால் காரியங்கள் கடைசி நேரத்தில் கைகூடிவிடும்.

மேஷ - குரு சஞ்சாரம்

நவக்கிரகத்தில் சுபகிரகம் என்று சொல்லப்படுபவர் குரு பகவான். அவர் உங்கள் ராசிநாதன் சுக்ரனுக்கு பகைக் கிரகமாக கருதப்படுபவர். அந்த குரு உங்கள் ராசிக்கு 12-ம் இடத்தில் ராகுவோடு இணைந்து சஞ்சரிக்கிறார். அவரது பார்வைக்கு பலன் உண்டு என்பதால், அந்த அடிப்படையில் சில நல்ல பலன்களும் உங்களுக்கு ஏற்படலாம். குருவின் பார்வை 4, 6, 8 ஆகிய இடங்களில் பதிகின்றது. எனவே தாய்வழி ஆதரவு கிடைக்கும். உறவினர்கள் இடையே ஏற்பட்ட மனக்கசப்பு மாறும். வாடகைக் கட்டிடத்தில் நடைபெற்ற தொழிலை, சொந்தக் கட்டிடத்திற்கு மாற்றலாமா? என்று சிந்திப்பீர்கள். தொழிலை விரிவு செய்ய எடுத்த முயற்சிக்கு, கேட்ட இடத்தில் தொகை கிடைக்கும்.

குருவின் பார்வை ரோக ஸ்தானத்தில் பதிவதால் ஆரோக்கியத் தொல்லை அகலும். ரண சிகிச்சை செய்ய வேண்டும் என்ற நிலை மாறி, சாதாரண சிகிச்சையிலேயே நோய் குணமாகும். ராகுவோடு குரு இணைந்திருப்பதால் பயணங்கள் அதிகரிக்கும். தூர தேசத்தில் இருந்து கூட அழைப்புகள் வரலாம். கேதுவின் மீது குருவின் பார்வை பதிவதால் ஆன்மிக நாட்டம் அதிகரிக்கும். அஷ்டம ஸ்தானத்திலும் குரு பார்வை பதிவதால் இழப்புகளை ஈடுசெய்யப் புதிய வாய்ப்புகள் வந்து சேரும். விலகியிருந்த சொந்தங்கள் மீண்டும் வந்திணைவர். பழைய தொழிலைக் கொடுத்துவிட்டுப் புதிய தொழில் தொடங்கும் முயற்சியில் ஆர்வம் காட்டுவீர்கள். இடமாற்றம், ஊர் மாற்றம், உத்தியோக மாற்றம் போன்றவை அவரவர் வாழ்க்கைத் தரத்திற்கு ஏற்ற விதம் அமையும். வரும் மாற்றங்கள் வளர்ச்சி தரக்கூடியதாகவே இருக்கும்.

சிம்ம - புதன்

ஆடி 7-ந் தேதி, சிம்ம ராசிக்குப் புதன் வருகிறார். உங்கள் ராசிக்கு 2, 5 ஆகிய இடங்களுக்கு அதிபதியானவர் புதன். அவர் சுக ஸ்தானத்திற்கு வருவது நன்மைதான். 'புத சுக்ர யோகம்' செயல்படும் இந்த நேரத்தில், சுக்ரன் மீது குருவின் பார்வையும் பதிவதால், இக்காலம் ஒரு இனிய காலமாகும். பிள்ளைகளின் எண்ணங்களைப் பூர்த்தி செய்வீர்கள். மதிப்பும், மரியாதையும் உயரும். தொழில் வெற்றி நடை போடும். உத்தியோகத்தில் மேலதிகாரிகளின் ஆதரவு திருப்தி தரும். பிள்ளைகளுக்கு வேலை கிடைத்து உதிரி வருமானங்களும் வந்துசேரும்.

பொதுவாழ்வில் உள்ளவர்களுக்கு பொறுப்புகள் அதிகரிக்கும். வியாபாரம், தொழில் செய்பவர்களுக்குச் சாதகமான நேரம் இது. உத்தியோகத்தில் உள்ளவர்களுக்கு உழைப்பிற்கேற்ற பலன் கிடைப்பது அரிது. கலைஞர்களுக்கு நல்ல வாய்ப்புகள் சில கைநழுவிப் போகலாம். மாணவர்களுக்கு மறதி அதிகரிக்கும். கிரகிப்புத் திறன் கொஞ்சம் குறையலாம். பெண்கள், தங்களுடைய நெருங்கிய உறவினர்களுடன் வாக்குவாதம் ஏற்படாத வகையில் பார்த்துக் கொள்ளுங்கள். ஆடை, ஆபரண சேர்க்கை உண்டு.

பணத்தேவையைப் பூர்த்தி செய்யும் நாட்கள்:-ஜூலை: 17, 18, 21, 22, ஆகஸ்டு: 2, 3, 6, 7, 14, 15.

மகிழ்ச்சி தரும் வண்ணம்:- பச்சை.