மின்சாரம் தாக்கி இறந்தவர்கள் குடும்பத்துக்கு தலா ரூ.10 லட்சம்

புதுச்சேரி

முத்தியால்பேட்டை தொகுதி பாரதிதாசன் மகளிர் கல்லூரி அருகில் உள்ள எம்.எஸ்.அக்ரகாரம் பகுதியில் அறுந்து கிடந்த மின்சார வயரை அப்புறப்படுத்த முயன்றபோது மின்சாரம் தாக்கி 2 பேர் இறந்தனர். மேலும் ஒருவருக்கு உயிருக்கு ஆபத்தான நிலையில் சிகிச்சை அளிக்கப்பட்டு வருகிறது.

இதைத்தொடர்ந்து பிரகாஷ் எம்.எல்.ஏ. முதல்-அமைச்சர் ரங்கசாமியை சந்தித்து, இறந்தவர்களின் குடும்பத்துக்கு அரசு சார்பில் ரூ.10 லட்சம் நிவாரணம் வழங்கவேண்டும் என்று வலியுறுத்தினார். இதுதொடர்பாக உரிய நடவடிக்கை எடுப்பதாக முதல்-அமைச்சர் உறுதியளித்தார். மேலும் சேதமடைந்த மின்கம்பங்கள், தாழ்வாக செல்லும் மின்வயர்களை உடனடியாக மாற்றி புதைவட மின் கம்பிகள் அமைக்க துரித நடவடிக்கை எடுக்கவேண்டும் என்றும் முதல்-அமைச்சர் மற்றும் மின்துறை அமைச்சரிடம் பிரகாஷ்குமார் எம்.எல்.ஏ. கோரிக்கை விடுத்தார்.