'மேற்கு வங்காளத்தில் பட்டாசு வெடித்தால் கூட மத்திய அமைப்புகள் விசாரிக்க வருகிறார்கள்' - மம்தா பானர்ஜி

கொல்கத்தா,

மேற்கு வங்காளத்தில் உள்ள சந்தேஷ்காளி பகுதியில் கடந்த ஜனவரி மாதம் அமலாக்கத்துறை அதிகாரிகள் மீது தாக்குதல் நடத்தப்பட்ட சம்பவம் தொடர்பாக சி.பி.ஐ. விசாரணை நடத்தி வருகிறது. இந்த விவகாரத்தில் தொடர்புடையதாக குற்றம்சாட்டப்பட்டுள்ள முன்னாள் திரிணாமுல் காங்கிரஸ் நிர்வாகி ஷாஜகான் ஷேக் கடந்த பிப்ரவரி 29-ந்தேதி மேற்கு வங்காள காவல்துறையால் கைது செய்யப்பட்டார்.

இதனிடையே சந்தேஷ்காளியில் உள்ள ஷாஜகான் ஷேக்கின் உதவியாளருக்கு சொந்தமான இரண்டு இடங்களில் சி.பி.ஐ. அதிகாரிகள் அதிரடி சோதனை நடத்தினர். இந்த சோதனையில் ஒரு போலீஸ் துப்பாக்கி, வெளிநாட்டு துப்பாக்கிகள் மற்றும் வெடிபொருட்கள் கண்டுபிடிக்கப்பட்டதாக சி.பி.ஐ. அதிகாரிகள் தெரிவித்துள்ளனர்.

இந்த நிலையில், சந்தேஷ்காளியில் ஆயுதங்கள் கைப்பற்றப்பட்டதற்கான எந்த ஆதாரமும் இல்லை என மேற்கு வங்காள முதல்-மந்திரி மம்தா பானர்ஜி தெரிவித்துள்ளார். இது தொடர்பாக அசான்சோல் தொகுதியில் நடைபெற்ற தேர்தல் பிரசாரத்தின்போது அவர் கூறியதாவது;-

"மேற்கு வங்காளத்தில் பட்டாசு வெடித்தால் கூட என்.ஐ.ஏ., சி.பி.ஐ., என்.எஸ்.ஜி. உள்ளிட்ட அமைப்புகள் விசாரணைக்கு வருகிறார்கள். இங்கு ஒரு போர் நடப்பதாகத் தெரிகிறது. இந்த விசாரணை குறித்து மாநில போலீசாருக்கு தகவல் தெரிவிக்கப்படவில்லை. சந்தேஷ்காளியில் என்ன கிடைத்தது என்பது குறித்து எந்த ஆதாரமும் இல்லை. கைப்பற்றப்பட்ட பொருட்களை சி.பி.ஐ. அதிகாரிகள் காரில் கொண்டு வந்திருக்கலாம்."

இவ்வாறு மம்தா பானர்ஜி தெரிவித்துள்ளார்.